Ku myaka 40, Cristiano Ronaldo ntarabona impamvu yo kugabanya umuvuduko. Nk’uko byatangajwe n’ikinyamakuru mu bijyanye n’ubucuruzi n’ubukungu ku rwego mpuzamahanga Forbes, uyu munya-Portugal yongeye kuza ku mwanya wa mbere w’abakinnyi binjiza amafaranga menshi ku isi mu mwaka wa 2025 – ku nshuro ya gatatu yikurikiranya.
Uyu rutahizamu wa Al Nassr FC muri Saudi Arabia, yinjije agera kuri $275 miliyoni (hafi £206.6 miliyoni) mu mwaka umwe, umubare udasanzwe utaragaragaye ku mukinnyi w’umupira w’amaguru kuva Floyd Mayweather (wakinaga boxing) yabona $300m mu 2015.
Ronaldo si umukinnyi gusa, ni ishoramari rihambaye
Ronaldo ari ku rwego rurenze umukinnyi usanzwe: ni ubucuruzi bugendanwa. Ku rubuga rwa Instagram, Facebook na X (Twitter) abarirwa hamwe mu bantu 939 miliyoni bamukurikira buri munsi, bikamuhesha inkunga z’ubucuruzi zifite agaciro karenze izo abakinnyi bagenzi be babona.
Kuva yagera muri Saudi Arabia mu Ukuboza 2022, amasezerano ye y’ubucuruzi yarazamutse cyane, ahanini bitewe no kuba iyi shampiyona iri gushora imari ikomeye mu guhindura isura yayo mu ruhando mpuzamahanga.
Abamukurikiye ku rutonde
Umunyamerika Stephen Curry, wamamaye mu gukora amanota ya “three-pointers” muri NBA, ni uwa kabiri ku rutonde n’amafaranga $156m. Ibi abikesha itangazamakuru, imyidagaduro n’imbere mu kibuga aho aherutse kuba uwa mbere mu mateka ugeze ku manota 4,000 y’ubwo bwoko.
Ku mwanya wa gatatu haje Tyson Fury, nubwo yatsinzwe na Oleksandr Usyk mu Ukuboza 2024, aho yambuwe ibikombe bye bya Heavyweight. Nta gitangaza ariko: yagaragaye muri filimi ya Netflix yitiriwe umuryango we ndetse anasinyana amasezerano n’ikigo cy’ubukerarugendo cya Malta.
Lionel Messi we yagabanutseho agera ku mwanya wa 5 n’amafaranga $135m, ibintu byerekana ko Ronaldo yasize benshi mu bo bafataga nkaho bahanganye mu myaka myinshi ishize.
Urutonde rw’abakinnyi 10 ba mbere mu mafaranga mu 2025
| Umwanya | Izina | Umukino | Amafaranga (USD) | Amafaranga (GBP) |
|---|---|---|---|---|
| 1 | Cristiano Ronaldo | Umupira w’amaguru | $275m | £206.6m |
| 2 | Stephen Curry | Basketball | $156m | £117.2m |
| 3 | Tyson Fury | Boxing | $146m | £109.7m |
| 4 | Dak Prescott | American Football | $137m | £103m |
| 5 | Lionel Messi | Umupira w’amaguru | $135m | £101.4m |
| 6 | LeBron James | Basketball | $133.8m | £105.5m |
| 7 | Juan Soto | Baseball | $114m | £85.7m |
| 8 | Karim Benzema | Umupira w’amaguru | $104m | £78.2m |
| 9 | Shohei Ohtani | Baseball | $102.5m | £77m |
| 10 | Kevin Durant | Basketball | $101.4m | £76.2m |
Ibihugu nka Saudi Arabia bikomeje gushora akayabo mu mikino, bigaragarira mu nzira, aho bifata ibyamamare mu mupira w’amaguru kugira ngo bishimishe abarebwa n’iyo mikino ariko binanakure izina ryabyo ku rwego mpuzamahanga.
