Ikigo RG Partners cyo mu Rwanda cyashyizeho ikoranabuhanga ry’ubwenge buhangano (AI) ryitezweho korohereza ibigo bito n’ibiciriritse (SMEs) gusobanukirwa amategeko y’imisoro, kubara imisoro igomba kwishyura no gutegura imenyekanisha ryayo mu gihe gito.
Mu gihe ibihugu byo muri Afurika bikomeje gushaka uburyo byagura umubare w’abasora no kunoza ikusanywa ry’imisoro, ikigo RG Partners cyo mu Rwanda kirimo kwifashisha ikoranabuhanga ry’ubwenge buhangano mu gufasha ibigo by’ubucuruzi kugendana n’amategeko y’imisoro agenda arushaho kuba ingorabahizi.
Umuyobozi Mukuru wa RG Partners, Mathieu Rwiyereka, avuga ko iri koranabuhanga rishobora gufasha gukemura ikibazo cy’ibura ry’amakuru ahagije hagati y’inzego z’imisoro n’abacuruzi, cyane cyane ibigo bidafite ubushobozi bwo guhemba abacungamari cyangwa abajyanama mu by’imisoro bahoraho.
Mu kiganiro yagiranye n’itangazamakuru i Kigali, ubwo habaga inama ngarukamwaka y’ihuriro nyafurika ry’abashakashatsi ku misoro (African Tax Research Network – ATRN), yavuze ko ihindagurika ry’amategeko y’imisoro, arimo umusoro ku nyongeragaciro (TVA/VAT) n’umusoro ku nyungu z’ibigo, rituma kubahiriza inshingano zo gusora birushaho kugora ibigo byinshi muri Afurika.
Yagize ati “Ndetse no kuri twe abajyanama mu by’imisoro, bishobora kudutwara iminsi ibiri kugira ngo tubashe kugira umuryango cyangwa ikigo tugira inama.”
Yasobanuye ko gukoresha ikoranabuhanga rigezweho bishobora kugabanya cyane igihe gitangwa mu gushaka no gusesengura amakuru y’imisoro, bityo serivisi zari zisanzwe zigera ku bigo bikomeye gusa zikagera no ku bacuruzi bato.
Sora Tax AI: Ikoranabuhanga rifasha mu kumenya no kubara imisoro
RG Partners, ikigo gikora igenzura ry’imari, ubujyanama mu by’imisoro n’ibijyanye n’imari, kikaba gifasha ibigo bitandukanye muri Afurika y’Iburasirazuba, cyashyizeho ikoranabuhanga ry’ubwenge buhangano ryitwa ‘Sora Tax AI.’
Nk’uko Rwiyereka abisobanura, iri koranabuhanga ryatangiriye ku bubiko bw’amakuru y’amategeko agenga imisoro, nyuma rigenda ryongerwamo andi makuru akomoka ku bitangazamakuru byemewe bya Leta, amabwiriza y’ubuyobozi n’izindi nyandiko zisobanura uko amategeko ashyirwa mu bikorwa.
Yavuze ko ubu buryo bugamije kwakira amakuru mashya ajyanye n’imisoro no kuyageza ku bayakoresha mu gihe gito cyane.
Ati “Iyo itegeko ritangajwe n’inzego zemewe, umujyanama mu by’imisoro ashobora kurifata akagisha inama abakoresha urwo rubuga mu masegonda 15.”
Yongeyeho ko Sora Tax AI ishobora no kubara imisoro no gufasha ibigo gutegura uko bizayishyura. Ikigo RG Partners kandi gifite gahunda yo kongeramo uburyo bwo kumenyekanisha imisoro hakoreshejwe ikoranabuhanga, igihe umusoreshwa abitanzeho uruhushya.
Iri koranabuhanga ritegerejweho gufasha cyane ibigo bito n’ibiciriritse, birimo byinshi bidafite ubushobozi bwo guhemba abajyanama babigize umwuga mu by’imisoro.
Gukumira amakosa no kurinda amakuru y’abakoresha
Nubwo yagaragaje akamaro k’ubwenge buhangano, Rwiyereka yavuze ko hakiri ibyago byo kwishingikiriza ku ikoranabuhanga rusange mu gutanga inama z’imari n’iz’imisoro.
Yagaragaje ko amakuru atari yo ashobora gutangwa n’ubwenge buhangano, akunze kwitwa AI hallucinations, ashobora gutuma umusoreshwa afata ibyemezo by’imari bimuteza igihombo.
Yagize ati “Kubera ko tuvuga iby’amafaranga, bishobora gutuma umuntu afata icyemezo kitari cyo ku bijyanye n’imari ye.”
Yashimangiye ko hakenewe amategeko n’ubugenzuzi bukwiye kugira ngo ikoreshwa ry’iri koranabuhanga ritabangamira inyungu z’abasora.
Nk’uko Rwiyereka abivuga, RG Partners yabonye impushya zijyanye no kurinda amakuru mu Rwanda, kandi urubuga rwa Sora Tax AI rukagenzurwa buri gihe n’inzobere mu by’imisoro.
Yongeyeho ko inzobere mu by’imari, imisoro n’amategeko zisuzuma amakuru ashingirwaho n’iri koranabuhanga kugira ngo hagabanywe amakosa, amakuru ayobya n’ivangura rishobora guterwa n’imikorere yaryo.
Gufasha ibigo bito kubahiriza inshingano zo gusora
RG Partners ivuga ko Sora Tax AI ari umufasha wa mbere mu Rwanda ukoresha ubwenge buhangano mu gufasha abasora kubahiriza inshingano zabo. Iri koranabuhanga rikora mu Kinyarwanda, Icyongereza n’Igifaransa.
Rwiyereka asanga ubu buryo bushobora guhindura uko ibigo byo muri Afurika bicunga inshingano zabyo z’imisoro, kuva ku kumenya imisoro ibireba n’inyungu z’amategeko bishobora kubyemerera, kugeza ku gutegura imenyekanisha ry’imisoro.
Yasobanuye ko mu gihe kiri imbere, ikigo cy’ubucuruzi gishobora kuzajya cyinjiza amakuru y’amafaranga cyinjije n’ayo cyakoresheje, kigasuzuma uko imisoro yacyo ihagaze, hanyuma kikuzuza imenyekanisha ry’imisoro mu minota mike aho kumara iminsi gishakisha amakuru no gukurikirana inzira z’ubuyobozi.
Gusa, yagaragaje impungenge z’uko hari uburyo bwo gusoresha bushobora gutuma inzego z’imisoro zungukira ku bihano n’inyungu z’ubukererwe bishyirwaho ibigo byananiwe gusobanukirwa neza inshingano zabyo.
Ati “Mu miterere yacu, tubona ibihano by’imisoro nk’ikiguzi cyo kutumva neza iby’imisoro.”
Yavuze ko kongera ubumenyi bw’abasora no kubagezaho ikoranabuhanga rihendutse bishobora kubafasha kubahiriza inshingano zabo ku bushake, ari na ko bifasha Leta kongera amafaranga yinjira ava imbere mu gihugu.
Ikoranabuhanga rigenewe ibigo byose, si ibigo bikomeye gusa
Kuri Rwiyereka, intego nyamukuru ni uko serivisi z’ubujyanama mu by’imisoro zikoresha ikoranabuhanga rigezweho zitakomeza kugera ku bigo binini gusa, ahubwo zikagera no ku bigo bito n’imiryango y’ubucuruzi ifite ubushobozi buke.
Yagize ati “Muri iki gihe turimo, buri bwoko bw’ikigo gito bukwiye kubona uburyo bwo kugera ku ikoranabuhanga rigezweho.”
Ibi bije mu gihe ibihugu byo muri Afurika bikomeje gushaka uburyo bwo kongera ubushobozi bwo gukusanya imisoro, mu gihe ibigo byinshi bikigaragaza imbogamizi zo gusobanukirwa amategeko n’inshingano zibireba.
Ikoranabuhanga nka Sora Tax AI rishobora kuba imwe mu nzira zifasha guhuza intego zo kunoza imisoro n’icyifuzo cyo korohereza abacuruzi, ariko imikorere yaryo izashingira ku kuri kw’amakuru ritanga, kurindwa kw’amakuru y’abarikoresha no kugenzurwa n’inzobere.
Inama nyafurika ku bushakashatsi bw’imisoro yabereye i Kigali
Iki kiganiro cyabaye mu nama ya 11 ngarukamwaka y’ihuriro nyafurika ry’abashakashatsi ku misoro (ATRN Annual Congress), yateguwe n’Ihuriro nyafurika ry’inzego z’imisoro (African Tax Administration Forum – ATAF).
Iyo nama yabereye i Kigali kuva ku wa 22 kugeza ku wa 24 Nzeri 2026, ifite insanganyamatsiko igira iti: “Ibibazo by’ingenzi by’imisoro muri Afurika muri iki gihe.”
Abayitabiriye baganiriye ku mbogamizi nshya zijyanye n’imisoro, zirimo ikoreshwa ry’ubwenge buhangano, gukoresha ikoranabuhanga mu buryo bwikora n’icyerekezo cy’imicungire y’imisoro muri Afurika.
Inama nk’izi zitanga umwanya wo kurebera hamwe uburyo ikoranabuhanga ryakoreshwa mu kunoza imikorere y’inzego z’imisoro, korohereza abasora no gufasha ibihugu kongera amafaranga bikura imbere mu bukungu bwabyo.
RG Partners ni ikigo cy’ubujyanama mu by’imari, kugenzura umutungo (audit), n’imisoro gikorera i Kigali mu Rwanda kuva mu mwaka wa 2016.
Ku bijyanye n’imisoro (Taxation), iki kigo kizwiho gufasha ibigo by’ubucuruzi bito n’ibinini (SMEs & Corporations) kumenya no kubahiriza amategeko y’imisoro mu Rwanda ngo bitagwa mu bihano by’Ikigo cy’Imisoro n’Amahoro (Rwanda Revenue Authority-RRA); byanatumye mu rwego rwo koroshya iby’imisoro, RG Partners yazanye umwihariko w’ikoranabuhanga rya Sora Tax AI.
