Tariki ya 7 n’iya 8 Werurwe 2026, mu Ntara y’Amajyepfo hazabera irushanwa ngarukamwaka rya Volleyball ‘Memorial Kayumba’ ritegurwa n’ishuri rya Groupe Scolaire Officiel de Butare (GSOB) mu rwego rwo kwibuka Padiri Kayumba Emmanuel wigeze kuba Umuyobozi waryo, ahazanakinwa n’indi mikino itandukanye.
Padiri Kayumba Emmanuel wabaye Umuyobozi wa Groupe Scolaire Officiel de Butare izwi nk’Indatwa n’Inkesha, yitabye Imana mu 2009; mu gihe kuva mu 2010 hatangijwe irushanwa rya Volleyball rigamije kumwibuka kuko na we yari umukunzi ukomeye w’uyu mukino.
Iri rushanwa rigiye gukinwa ku nshuro yaryo ya 16 rizitabirwa n’amakipe ya Volleyball akina muri Shampiyona y’Icyiciro cya Mbere mu Bagabo n’Abagore, abakiri bato mu bahungu ndetse n’abakanyujijeho muri uwo mukino.
Mu bagabo bakina Icyiciro cya mbere hamaze kwiyandikisha amakipe ya KVC, REG VC, Gisagara VC, APR VC, Kirehe VC, RP Ngoma College VC, RP Musanze College VC, East African University (EAUR) VC na Kepler VC mu gihe mu bagore hiyandikishije APR WVC, RRA WVC, Kepler WVC, RP Kigali College WVC, Ruhango WVC, Police WVC na East African University (EAUR) WVC.
Mu cyiciro cy’abahungu bakiri bato harimo GSOB, Collège du Christ Roi Nyanza, Petit Seminaire Virgo Fidelis, Kaminuza y’u Rwanda (UR), GS. St Joseph Kabgayi, Nyaruguru VC, Rusumo High School, Gitisi, College St. Ignace Mugina, Nyanza TSS (Eto Gitarama), APE Rugunga, GS Kabare n’Irerero rya Gisagara VC.
Ibibuga bizakoreshwa uyu mwaka ni ibyo muri Groupe Officiel de Butare, mu gihe Gymnase ya Gisagara n’iya Kaminuza y’u Rwanda Ishami rya Huye zishobora kwifashishwa mu gihe cy’imvura.
Umuyobozi wa GSOB, Padiri Hakizimana Charles, yavuze ko irushanwa ry’uyu mwaka ryihariye kuko rigiye kuba mu gihe ishuri rikomeje imyiteguro yo kwizihiza yubile y’imyaka 100 mu 2029.
Ati “Twashyizemo icyiciro gishya cy’imikino gakondo irimo igisoro gikundwa cyane n’abatuye mu Karere ka Huye no hirya no hino mu gihugu kandi bizongera uburyohe bw’irushanwa. Rigenda ryaguka buri mwaka, hari amakipe asanzwe yitabira n’amashya yo mu gihugu azitabira.”
Mu 2025, Gisagara VC yegukanye igikombe mu bagabo itsinze East African University amaseti 3-0 (25-20, 25-19, 25-18) naho APR WVC igitwara mu bagore itsinze Kepler WVC amaseti 3-2 (24-26, 25-8, 20-25, 25-13, 15–10) naho.
Mu ngimbi, irushanwa ryatwawe na Gisagara Volleyball Academy itsinze Nyanza TSS amaseti 3-0 (25-21, 25-13, 25-16).
‘Tournoi Mémorial Abbé Kayumba Emmanuel’ yatangiye yitabirwa n’amakipe atandukanye akina Shampiyona y’Icyiciro cya Mbere muri Volleyball ndetse n’amashuri abanza n’ayisumbuye; ni mu gihe mu myaka ibiri ishize, hiyongereyemo umukino wo gusiganwa ku magare waje usanga uw’abarushanwa mu koga, ndetse uyu mwaka hakaba hongewemo igisoro.
