Mu rwego rwo gushimangira ibikorwa bigamije kurangiza amakimbirane mu burasirazuba bwa Repubulika Iharanira Demokarasi ya Congo (RDC), imiryango y’ubukungu n’iterambere ya Afurika y’Iburasirazuba (EAC) n’iy’Afurika y’Amajyepfo (SADC) yemeye guhuza gahunda zayo zose z’amahoro.
Ibyo byemejwe mu nama y’abakuru b’ibihugu by’iyi miryango yabaye ku wa 13 Kanama 2025 hifashishijwe ikoranabuhanga, hashingirwa ku cyifuzo cyavuzwe bwa mbere mu nama y’abahuza n’abayobozi yabaye ku wa 1 Kanama 2025.
Binyuze muri uyu mwanzuro, abahuza bashyizweho na EAC na SADC bazakorana n’uhagarariye Umuryango wa Afurika Yunze Ubumwe (AU), Faure Essozimna Gnassingbé, bigize inteko imwe y’abahuza. Ku rutonde rw’abahuza rusanzwe, hongewemo Perezida Mokgweetsi Masisi wa Botswana, asanga Olusegun Obasanjo wahoze ayobora Nigeria, Uhuru Kenyatta wahoze ari Perezida wa Kenya, Catherine Samba Panza wahoze ayobora Centrafrique, na Sahle-Work Zewde uyobora Ethiopia.
Abakuru b’ibihugu byombi banemeye guhuza amategeko agenga imikorere y’abahuza ba AU na ba EAC–SADC, ndetse bashyiraho ubunyamabanga buhurijeho buzajya butegura gahunda z’ibiganiro by’amahoro, bukaba buyobowe na Komisiyo ya AU.
Aba bayobozi bashimiye Perezida Paul Kagame n’uwa RDC Félix Tshisekedi ku kuba barahisemo inzira y’ibiganiro mu gukemura amakimbirane hagati y’ibihugu byombi, banashyigikira ibiganiro biri kubera i Washington n’i Doha.
Iyi myanzuro ije nyuma y’uko ku wa 27 Kamena 2025 u Rwanda na RDC byasinye amasezerano y’amahoro ku bufasha bwa Leta Zunze Ubumwe za Amerika, ndetse na nyuma y’uko ku wa 19 Nyakanga 2025 Leta ya RDC n’ihuriro AFC/M23 byemeranyije amahame ngenderwaho azashingirwaho mu masezerano arambye, ku bufasha bwa Qatar.
