Impuzamashyirahamwe y’Umupira w’Amaguru muri Afurika (CAF) yatangaje urutonde rw’amakipe 75 yitwaye neza ku mugabane wa Afurika mu marushanwa yayo aheruka, aho ibi byabaye mbere y’uko habaho tombola y’imikino Nyafurika y’uyu mwaka.
Iri tangazo ryashyizwe ahagaragara mu gitondo cyo kuri uyu wa Gatanu, tariki ya 8 Kanama 2025, mbere y’uko kuri uyu wa Gatandatu tariki ya 9 Kanama 2025 i Dar es Salaam muri Tanzania, haba tombola y’amatsinda ya CAF Champions League na CAF Confederation Cup.
Ku isonga y’urwo rutonde haza Al Ahly SC yo mu Misiri, imaze imyaka myinshi igaragaza ubudahangarwa muri ruhago ya Afurika, aho ifite amanota 75. Iyi ikurikirwa na Mamelodi Sundowns yo muri Afurika y’Epfo ifite amanota 62, mu gihe Espérance de Tunis yo muri Tuniziya iri ku mwanya wa gatatu n’amanota 57.
RS Berkane yo muri Maroc na Simba SC yo muri Tanzania zuzuza amakipe atanu ya mbere, aho zifite amanota 52 na 48 ku rutonde rwakozwe hashingiwe ku musaruro w’amarushanwa ya CAF y’imyaka yashize.
Afurika y’Epfo ni cyo gihugu gifite umubare munini w’amakipe ari kuri uru rutonde, aho ibarurirwamo umunani. Algeria ifite arindwi, mu gihe Misiri, Angola na Repubulika Iharanira Demokarasi ya Congo (RDC) bifite amakipe atanu buri kimwe.
Nubwo u Rwanda rugiye guhagararirwa na APR FC muri CAF Champions League na Rayon Sports muri CAF Confederation Cup, nta kipe n’imwe y’u Rwanda yagaragaye kuri uru rutonde rw’amakipe 75 ya mbere ya Afurika.
Ibi bikomeje kwerekana icyuho cy’amarushanwa mpuzamahanga ku makipe yo mu Rwanda, binagaragaza ko hakiri urugendo rurerure kugira ngo ahangane n’amakipe akomeye ku mugabane.
Urutonde rw’amakipe 5 ya mbere ku mugabane:
- Al Ahly SC (Misiri) – amanota 75
- Mamelodi Sundowns (Afurika y’Epfo) – amanota 62
- Espérance de Tunis (Tuniziya) – amanota 57
- RS Berkane (Maroc) – amanota 52
- Simba SC (Tanzania) – amanota 48
Tegereje kureba uko tombola y’amarushanwa Nyafurika iteganyijwe kuri uyu wa Gatandatu izagabanya aya makipe, n’uko abahagarariye u Rwanda bazitwara muri uyu mwaka w’imikino.
