Minisitiri w’Ububanyi n’Amahanga n’Ubutwererane w’u Rwanda, Ambasaderi Olivier Nduhungirehe, ari mu ruzinduko rw’akazi rw’iminsi ibiri muri Hongiriya, rugamije kurushaho gushimangira umubano n’ubufatanye hagati y’ibi bihugu byombi.
Urwo ruzinduko rwashimangiwe n’ibikorwa by’ingenzi birimo igikorwa cyo gutaha ku mugaragaro Ambasade y’u Rwanda i Budapest, cyitabiriwe n’Abanyarwanda baba muri Hongiriya ndetse n’abayobozi bakuru ba Leta ya Hongiriya. Iyo Ambasade iyobowe na Ambasaderi Margueritte Francoise Nyagahura, washyikirije impapuro zimwemerera guhagararira u Rwanda ku mugaragaro ku wa 26 Werurwe 2024, na Perezida wa Hongiriya, Dr. Tamás Sulyok.
Ambasade nshya i Budapest ifite inshingano zo guteza imbere umubano w’ibihugu byombi mu nzego zitandukanye zirimo ubucuruzi, ishoramari, ubukerarugendo, n’ubutwererane mu bya politiki n’imiyoborere. Ni intambwe ifatika mu rwego rwo kwimakaza dipolomasi itanga umusaruro ishingiye ku nyungu z’igihe kirekire.
Mu rwego rwo kurushaho gusigasira iyo ntambwe, Minisitiri Nduhungirehe yahuye n’abayobozi batandukanye barimo Minisitiri w’Ububanyi n’Amahanga wa Hongiriya, aho bagarutse ku masezerano y’ubufatanye yashyizweho umukono mu myaka yashize ndetse banaganira ku cyerekezo cy’igihe kizaza mu bufatanye hagati y’impande zombi.
Ibihugu byombi bisanzwe bifitanye amateka y’ubufatanye yihariye. Mu 2023, Perezida wa Hongiriya, Madamu Katalin Novák, yagiriye uruzinduko mu Rwanda, aho yakiriwe na Perezida Paul Kagame. Urwo ruzinduko rwasize impande zombi zishyize umukono ku masezerano menshi arimo ay’uburezi, ubuhanga n’ikoranabuhanga, amahugurwa y’abakozi n’imishinga y’iterambere rirambye.
Mu rwego rw’uburezi, Hongiriya yemeye kwakira abanyeshuri b’Abanyarwanda mu mashuri makuru nza kaminuza zayo binyuze muri gahunda y’inkunga ya “Stipendium Hungaricum”, ikaba yaratangiye gutanga umusaruro ugaragara mu kurushaho kunguka ubumenyi n’ubunararibonye bwifashishwa mu kubaka u Rwanda rwifuzwa.
Kongera kuri ibyo, Hongiriya yemeye gutanga inguzanyo ya miliyoni 52 z’amadolari yo kuvugurura uruganda rutunganya amazi rwa Karenge mu Karere ka Rwamagana, igikorwa cyitezweho kuzamura ireme ry’ubuzima no kugabanya icyuho mu bikorwaremezo by’amazi meza.
Minisitiri Nduhungirehe kandi yagaragaje ko hari icyizere cyinshi mu bufatanye hagati y’ibihugu byombi, anemeza ko hazakomeza gushyirwa imbaraga mu bufatanye mu bijyanye n’ingufu, ubuhinzi, inganda n’ihangwa ry’imirimo. Yagize ati:
“U Rwanda rwiteguye gukomeza guha isoko amahirwe y’ubufatanye na Hongiriya, cyane cyane mu nzego zifitiye abaturage akamaro. Kuba dufunguye Ambasade hano ni ikimenyetso cy’icyizere n’ubufatanye bw’igihe kirekire.”
Ibihugu byombi byanemeranyije koroshya imigenderanire binyuze mu masezerano yemerera abashoramari n’abakerarugendo gutembera hagati y’ibi bihugu mu buryo bworoshye, bigamije kongerera agaciro ubucuruzi no gufasha sosiyete zombi kwagura ibikorwa.
Ku wa Kabiri tariki ya 13 Gicurasi 2025, Minisitiri Nduhungirehe biteganyijwe ko azagirana ibiganiro n’abandi bayobozi barimo abashinzwe ubucuruzi n’ishoramari, mu rwego rwo kwiga amahirwe y’inkunga n’imishinga ishobora gukorerwa ku bufatanye n’inzego z’abikorera.
Uruzinduko rwe rwitezweho gutuma umubano w’u Rwanda na Hongiriya urushaho kuba indashyikirwa, uherekezwa n’ubufatanye bwuzuye bushyigikira iterambere rirambye mu mpande zombi.
