Nyuma yo gusoza NST1, Leta y’u Rwanda yatangiye gushyira mu bikorwa gahunda ya kabiri yo kwihutisha iterambere (NST2), igamije impinduka zifatika mu rwego rw’amazi, isuku n’isukura. Iyi gahunda izarangira mu 2029, igamije kongera amazi meza atangwa buri munsi no kugera ku ngo nshya miliyoni imwe zizagerwaho n’amazi meza.
Kuri uyu wa Mbere, tariki ya 12 Gicurasi 2025, Minisitiri w’Ibikorwa Remezo, Dr. Gasore Jimmy, yatangaje ko NST2 izarangira igihugu gifite ubushobozi bwo gutanga metero kibe 668,000 z’amazi buri munsi, ugereranyije na 343,000 zatangwaga ku munsi mu 2023/2024.
Ibi yabigarutseho ubwo yitabaga Komisiyo y’Ingengo y’Imari n’Umutungo w’Igihugu mu Nteko Ishinga Amategeko, mu biganiro bijyanye n’isuzuma ry’ingengo y’imari ya 2024/2025 ndetse n’imbanzirizamushinga y’iya 2025/2026.
“Intego dufite ni ugukuba kabiri amazi dushobora gutanga buri munsi. Twatangiye dutanga metero kibe ibihumbi 343, ariko dufite imishinga izatuma tugeze kuri 668,000 bitarenze 2029,” Dr. Gasore yabwiye Abadepite.
Uretse kongera amazi atangwa, NST2 izibanda ku kugeza amazi meza ku ngo nshya miliyoni imwe. Kugeza ubu, imibare ya MININFRA igaragaza ko ingo zigera kuri 18% ari zo zifite amazi meza aturuka ku muyoboro wizewe. Biteganyijwe ko mu mwaka w’ingengo y’imari 2025/26, ingo nshya ibihumbi 500 zizagezwamo amazi meza.
“Ibi bivuze ko mu myaka ine iri imbere, tuzaba twarenze 50% by’ingo zifite amazi meza. Ibyo ni intambwe ikomeye mu rugamba rwo guteza imbere imibereho y’abaturage,” Dr. Gasore yakomeje.
Mu rwego rwo gukomeza kunoza serivisi z’amazi, MININFRA iteganya kubaka ibirometero 665 by’imiyoboro mishya y’amazi bitarenze 2026. Ikindi gikorwa gikomeye ni ukongera imiyoboro yasenyutse cyangwa itagikora, aho ibirometero 162 bizasanwa mu cyaro, mu gihe indi miyoboro 432 izasanwa mbere y’uko NST2 isozwa.
By’umwihariko, NST2 izasiga u Rwanda rufite ibirometero 4,600 by’imiyoboro y’amazi ikora neza, bikazagira uruhare rukomeye mu kugabanya umwanya n’imvune abaturage bahuraga na byo mu gushaka amazi, cyane cyane mu bice by’icyaro.
Impinduka zitezwe:
- Kongera amazi atangwa buri munsi kuva kuri 343,000 m³ kugeza kuri 668,000 m³.
- Kugera ku ngo nshya miliyoni 1 zifite amazi meza.
- Kubaka imiyoboro mishya y’amazi ya km 665.
- Gusanura imiyoboro yangiritse ingana na km 432.
- Kugeza kuri km 4,600 z’imiyoboro y’amazi ikora neza.
Ibi bikorwa byose ni igice cy’icyerekezo kirambye cya Leta y’u Rwanda mu guteza imbere imibereho myiza y’abaturage, no kugera ku iterambere rirambye rishingiye ku baturage bafite ubuzima bwiza, amazi meza n’isuku ihamye. NST2 ni ikimenyetso cy’uko igihugu gikomeje gutera intambwe igana ku Rwanda rwifuzwa muri 2050.
