Urukiko rw’Ibanze rwa Kicukiro rwasomye icyemezo cyo gufungura by’agateganyo Bwana Ntazinda Erasme, wahoze ari Meya w’Akarere ka Nyanza, wari ukurikiranyweho ibyaha birimo ubushoreke no guta urugo.
Icyemezo cyasomwe ku gicamunsi cyo kuri uyu wa Gatanu tariki ya 9 Gicurasi 2025, kikaba cyashingiye ku mbabazi zatanzwe n’umugore we w’isezerano, wasabye guhagarika ikurikirana ry’urubanza rwari rwaramaze gutangira.
Bwana Ntazinda yafashwe ku wa 16 Mata 2025 n’Urwego rw’Igihugu rw’Ubugenzacyaha (RIB), nyuma y’uko hari amakuru yatangiye kuvugwa ku myitwarire ye idahwitse ijyanye no kudasohoza inshingano ze nk’umuyobozi w’Akarere.
Ibi byakurikiwe n’inama idasanzwe y’Inama Njyanama y’Akarere ka Nyanza yateranye ku wa 15 Mata 2025, yanzura kumukura ku mirimo nyuma y’igenzura ryagaragaje ko atari akijyanye n’inshingano ze nk’uko amategeko abiteganya.
Ubushinjacyaha bwari bwashyikirije urukiko dosiye isaba ko afungwa by’agateganyo, bitewe n’uko yari akurikiranyweho ibyaha bikomeye bifitanye isano n’ubushoreke ndetse no guta urugo, nk’uko biteganywa mu ngingo ya 140 y’itegeko rigena ibyaha n’ibihano muri rusange ryasohotse mu 2018.
Iyi ngingo ishimangira ko icyaha cy’ubushoreke gishobora gukurikiranwa gusa iyo uwahemukiwe mu bashakanye agitanzemo ikirego, kandi akagihagarika igihe cyose abyifuje, urubanza rukaba ruhita ruhagarara.
Urubanza rwe rwagombaga kuburanishwa ku wa 6 Gicurasi, ariko rusubikwa ku busabe bw’umwunganizi we mu mategeko Me Nyangenzi Bonane, watanze inzitizi zemewe n’urukiko rwasabye igihe cyo kuzisuzuma.
Byongeye, ku wa 3 Gicurasi 2025, umugore wa Ntazinda yandikiye urukiko ibaruwa asaba ko yakuraho ikirego yari yaratanze, ashimangira ko amubabariye kandi adashaka ko akomeza gukurikiranwa n’amategeko.
Urukiko rwasanze nta mpamvu ikomeye isigaye yo gukomeza ifungwa rye, ruheraho rutegeka ko arekurwa.
Nubwo arekuwe, Ntazinda ashobora gukomeza gukurikiranwa mu zindi nzego z’imyitwarire mu bayobozi, hashingiwe ku myanzuro yafashwe n’Inama Njyanama yamweguzaga ku nshingano ze z’ubuyobozi.
Abasesenguzi mu by’amategeko bavuga ko uru rubanza rugaragaza uko amategeko y’u Rwanda aha agaciro ubushake bw’abaregera, cyane cyane mu manza zishingiye ku makimbirane y’urugo, ariko kandi bikerekana ko imyitwarire y’abayobozi mu buzima bwabo bwite igira ingaruka ku mwanya wabo mu buyobozi.
