Abakinnyi 398 baturuka mu makipe atandukanye n’abiyandikishije ku ruhande barahatana muri Shampiyona yo gusiganwa ku Maguru ‘National Cross-Country Championship 2025’ izabera muri IPRC Kigali kuri uyu wa Gatandatu, tariki ya 18 Mutarama 2025.
Abarushanwa barasiganwa mu byiciro birimo icy’abagabo bakuru cy’ibilometero 10, abatarengeje imyaka 20 basiganwe ibilometero 8, naho abari munsi y’imyaka 18 barushanwe ku ntera y’ibilometero 6.
Mu cyiciro cy’abagore, abakuru barasiganwa ibilometero 10 mu gihe abari munsi y’imyaka 20 barushanwa ku bilometero bitandatu naho abatarengeje imyaka 18 bakine ku ntera y’ibilometero bine.
Abakinnyi 398 bitabira barimo abava mu makipe arimo APR A.C, Police A.C, UR Huye College A. C, SINA Gerard A.C, Nyaruguru A.C, Rutsiro A.C, Huye A.C, Nyamasheke A.C, GS St Aloys AC, Kavumu, Kamonyi A.C, Kinyinya A.C n’abandi biyandikishije ku giti cyabo.
Iyi shampiyona yo gusiganwa ku maguru itegurwa n’Ishyirahamwe ry’Imikino Ngororamubiri mu Rwanda (RAF) ni yo iri butoranyirizwemo abakinnyi bazahagararira u Rwanda muri Shampiyona y’Isi izabera mu Mujyi wa Florida muri Leta Zunze Ubumwe za Amerika ku wa 10 Mutarama 2026.
Mutabazi Emmanuel wa Police Athletic Club na Imanizabayo Emelyne wa Sina Gerard Athletic Club, ni bo baheruka kwegukana ‘National Cross-Country Championship’, Shampiyona yakinwe ku wa 2 Ukuboza 2023.
