Mu mpera z’iki Cyumweru, ku wa Gatanu tariki 29 no ku wa Gatandatu tariki 30 Gicurasi 2026, amakipe yabaye ane ya mbere muri shampiyona ya Volleyball azahurira mu Karere ka Gisagara, mu irushanwa ryiswe ‘Climate Action Volleyball Tournament’.
Ni irushanwa rishya riri ku ngengabihe y’Ishyirahamwe ry’umukino wa Volleyball mu Rwanda (FRVB) ryiswe ‘Climate Action Volleyball Tournament‘; ryashyizweho hagamijwe kubungabunga ibidukikije.
Iri rushanwa rizakinwa tariki ya 29 n’iya 30 Gicurasi 2026, rikabera mu Karere ka Gisagara; rizahuza amakipe ya APR WVC yegukanye igikombe cya shampiyona 2025/2026, Police WVC, Kepler WVC na RRA WVC mu bagore, mu gihe mu bagabo rizahuza REG VC yegukanye shampiyona ya 2025/2026, Police VC, Kepler VC ndetse na Gisagara VC.
Ni irushanwa ryateguwe ku bufatanye bwa Minisiteri y’ibidukikije, Ikigo cy’igihugu cyo kubungabunga ibidukikije (REMA), Umushinga wa Green Amayaga, Ishami ry’Umuryango w’Abibumbye ryita ku Iterambere; ishami ry’u Rwanda (UNDP Rwanda), GEF ndetse na FRVB.
