Nyuma y’aho akanama k’ubujurire mu Mpuzamashyirahamwe y’Umupira w’Amaguru muri Afurika (CAF) kanzuye ko Senegal iterwa mpaga y’ibitego 3-0 ku mukino wa nyuma w’igikombe cya Afurika 2025 yatsinzemo Maroc yakiriye 1-0, ikamburwa igikombe; Ishyirahamwe ry’Umupira w’Amagaru muri Senegal ryatangaje ko rijuririra umwanzuro uyu mwanzuro.
Uyu mwanzuro wafashwe n’Akanama ku bujurire muri CAF ku wa 17 Werurwe 2026, aho kavuze ko hisunzwe ingingo ya 82 n’iya 84 z’amategeko agenda Igikombe cya Afurika; aho zivuga ku kwikura mu kibuga nk’uko Senegal yabikoze zikunganirwa n’iya 83 ivuga ku kubura ku kibuga kw’ikipe.
Ingingo ya 82 ivuga ko ‘Iyo ikipe yikuye mu irushanwa cyangwa ntigaragare ku mukino cyangwa ikikura mu kibuga mbere y’uko umukino urangira itabiherewe uburenganzira n’umusifuzi iterwa mpaga ndetse igakurwa mu irushanwa yakinaga.’
Iyi ngingo yunganirwa n’iya 83 ivuga ko ‘Ikipe itagaragaye ku kibuga ku isaha yagenweho gutangira ku mukino bikarenga iminota 15 igomba guterwa mpaga umusifuzi akandika ko yabuze muri raporo ye, abategura irushanwa bakazafata icyemezo cya nyuma babigendeyeho.’
Izi ngingo uko ari ebyiri, zikomatanyirizwa hamwe n’iya 84 ari nayo yashyizwe mu bikorwa, aho ivuga ko ‘Ikipe itubahirije iya 82 n’iya 83 ikurwa mu irushanwa, igaterwa mpaga y’ibitego 3-0 ari nabyo byakorewe Senegal kuko yavuye mu kibuga hagashira iminota 16.’
Kwamburwa Igikombe cya Afurika kwa Senegal bivuze ko Maroc ariyo yegukanye iri rushanwa ryakiniwe iwayo kuva tariki 21 Ukuboza 2025 kugeza tariki 18 Mutarama 2026, ibintu ikoze ku nshuro ya kabiri nyuma y’igikombe yatwaye mu 1976.
Byagenze gute ku mukino wa nyuma?
Uyu mukino wahuzaga Senegal na Maroc, iminota 90 yarangiye amakipe yombi anganya 0-0 hashyirwaho inyongera; ku munota wa karindwi w’inyongera ikipe ya Maroc yabonye koroneri itewe umusifuzi Jean Jacques Ndala yemeza ko El Hadji Malick Diouf yakoreye ikosa Brahim Diaz ubwo yamukururaga akagwa hasi mu rubuga rw’amahina; nyuma yo kwifashisha ikoranabuhanga rya VAR; birangira penaliti yemejwe.
Iyi penaliti yateje impaka kugeza ubwo abakinnyi ba Senegal bavuye mu kibuga banze ko iterwa, nyuma yo kubisabwa n’umutoza wabo Pape Thiaw byatumye umukino umara iminota 16 uhagaze.
Nyuma y’ibiganiro byabaye abakinnyi ba Senagal bamwe banagiye mu rwambariro, bigizwemo uruhare na Sadio Mane basabwe kugaruka mu kibuga penaliti iterwa na Rutahizamu Brahim Diaz usanzwe ukinira Real Madrid muri Espagne, wateye agapira koroshye ’Panenka’, umuzamu Edouard Mendy ayikuramo mu buryo bumworoheye afata umupira arawugumana.
Iminota isanzwe y’umukino yahise irangira hongerwaho indi 30. Ibintu byahindutse mu gace ka mbere k’iyi minota aho ku munota wa kane Idrissa Gana Gueye yahaye umupira Pape Gueye wateye ishoti mu izamu rya Maroc agatsinda igitego cya mbere cya Senagal cyasoje iminota 15 ya mbere y’inyongera ari igitego 1-0.
Iminota 120 yarangiye Senegal ikiyoboranye igitego 1-0 hongerwaho iminota itatu nayo yarangiye iki gihugu cyegukanye Igikombe ibyari inshuro ya kabiri mbere yo kucyamburwa ku wa 17 Werurwe 2026 batewe mpaga y’ibitego 3-0 na Maroc yagihawe.
Senegal yiyemeje kujuririra icyemezo cy’akanama k’ubujurire ka CAF
Ishyirahamwe ry’umupira w’amaguru muri Senegal (FSF) ryatangajeko bashingiye ku myanzuro yasohotse mu ijoro ryo ku wa 17 Werurwe 2026, ivuga ko Senegal itewe mpaga ku mukino wa nyuma yari yatsinzemo Maroc 1-0, ikanamburwa igikombe yatwaye; igiye kujya mu Rukiko rwa Siporo ku Isi (CAS) ikarenganurwa; kuko ibyemezo byayifatiwe bitanyuze mu mucyo ahubwo bibogamiye kuri Maroc kuko batigeze banahabwa umwanya wo kumvwa nk’abaregwa.
Senagal ivuga ko mu ifatwa ry’umwanzuro wo kuyitera mpaga hahonyowe itegeko rya gatanu rya ruhago rivuga ko ibyemezo byafashwe n’umusifuzi mu mukino ari ntakuka, kandi ko abakinnyi ba Senegal bari bavuye mu kibuga, bakigarutsemo, penaliti bari banze igaterwa umukino nawo ugakomeza, kugeza iminota isanzwe irangiye hakanongerwaho 30 y’inyongera yarangiye batsinze umukino ukarangizwa n’umusifuzi bisanzwe.
Ishyirahamwe ry’Umupira w’Amagaru muri Senegal kandi ryavuze ko rizakomeza gutanga amakuru kuri iki kibazo, mu gihe hirya no hino muri Afurika no Isi muri rusange, abantu benshi batunguwe n’umwanzuro wo kuyambura igikombe hashize amezi hafi atatu irushanwa rirangiye n’igikombe gitanzwe.
