Abahanzi nyarwanda Bruce Melodie na Element EleéeH bashyizwe mu bahatanira igihembo cy’umuhanzi mwiza w’umwaka muri Afurika y’Iburasirazuba (Best Male Artist in East Africa) mu bihembo bikomeye bya AFRIMA (All Africa Music Awards) 2025 bizabera i Lagos, muri Nigeria, kuva tariki ya 25 kugeza 30 Ugushyingo 2025.
Bruce Melodie ahatanye abikesha indirimbo ye “Beauty on Fire” yakoranye n’umuhanzi w’Umunyanijeriya Joeboy, mu gihe Element EleéeH we ari mu bahatanira iki gihembo anyuze ku ndirimbo “Tombé.”
Aba bahanzi b’Abanyarwanda bazahatana n’ibyamamare mu muziki wa Afurika y’Iburasirazuba barimo Diamond Platnumz, Bien, Joshua Baraka, Juma Jux, Marioo, Mbosso, Sat-B na Yared Negu.
Uretse iki cyiciro, AFRIMA izanahuriza hamwe amazina akomeye ku mugabane w’Afurika nka Burna Boy, Davido na Rema, bazaba bahatanira ibihembo bitandukanye muri uyu mwaka.
Amatora yo gutora abahanzi bazegukana ibihembo azatangira ku itariki ya 10 Nzeri 2025 anyuze ku rubuga rwa AFRIMA, agasozwa ku ya 30 Ugushyingo 2025, umunsi umwe mbere y’uko ibi birori bikomeye bitangira.
Ibi bihembo bitegurwa ku bufatanye na Komisiyo y’Afurika Yunze Ubumwe, Guverinoma ya Nigeria ndetse na Leta ya Lagos, ikaba ari yo isanzwe ibyakira.
