U Rwanda rwiteguye kwakira bwa mbere umwiherero mpuzamahanga wa Basketball Without Borders Africa (BWB), uzahuriza hamwe urubyiruko rufite impano zikomeye mu mukino wa Basketball ruturuka mu bihugu bitandukanye byo ku mugabane wa Afurika.
Uyu mwiherero uteganyijwe kuva ku wa 23 kugeza ku wa 26 Kanama 2025, ukazabera muri Petit Stade n’ahazwi nka BK Arena i Kigali. Biteganyijwe ko uzitabirwa n’urubyiruko 60 rufite imyaka itarenga 18, ruzatoranywa mu bihugu birenga 20 bya Afurika.
Umwihariko w’uyu mwiherero
Basketball Without Borders ni ubufatanye bwa Shampiyona ya Basketball muri Amerika (NBA) n’Impuzamashyirahamwe y’Umukino wa Basketball ku Isi (FIBA). Bwashyiriweho guhuriza hamwe impano z’abana bato, bakazahabwa imyitozo n’ubujyanama bw’abakinnyi b’ibyamamare muri NBA na WNBA ndetse n’abatoza mpuzamahanga.
I Kigali, ni ubwa mbere uyu mwiherero ugiriye muri Afurika y’Iburasirazuba. Mbere waberaga mu bihugu birimo Angola, Misiri, Sénégal na Afurika y’Epfo.
Umuyobozi wa NBA Africa, Clare Akamanzi, yatangaje ko iki gikorwa gifite uruhare rukomeye mu guteza imbere impano z’urubyiruko rw’Afurika. Yagize ati:
“Basketball Without Borders Africa ikomeje gufungura amarembo ku rubyiruko rw’Afurika kugira ngo rwigire ku bafite ubunararibonye, bityo ruzamure urwego rw’imikinire rukagera ku rwego mpuzamahanga.”
Ku ruhande rwa FIBA, Umuyobozi w’Ishami ry’Abakinnyi, Kimberley Gaucher, yavuze ko guhitamo u Rwanda nk’ahantu hategurirwa uyu mwiherero ari ikimenyetso cy’uko igihugu cyabaye igicumbi cya Basketball muri Afurika mu myaka yashize.
Ubufatanye n’abaterankunga
Uru rugendo ruzaterwa inkunga na NIKE, isanzwe iha imyambaro n’inkweto abazitabira kuva mu 2002. Mu mwaka wa 2023 ubwo umwiherero wabereye muri Afurika y’Epfo, Umunyarwandakazi Dusabe Jane ni we wahize abandi mu bakobwa 40 bitabiriye, yegukana igihembo cy’umukinnyi wazamuye urwego rwe kurusha abandi.
Kuva mu 2001, abana 4600 baturutse mu bihugu 144 bamaze kwitabira Basketball Without Borders, mu gihe 142 muri bo bamaze kugera ku rwego rwa NBA na WNBA. Abamamare nka Joel Embiid (Philadelphia 76ers), Pascal Siakam (Indiana Pacers, watwaye NBA mu 2019) ndetse na Khaman Maluach wo muri Sudani y’Epfo, uherutse kwinjira muri NBA akinira Phoenix Suns, bose banyuze muri uyu mwiherero.
