Kuri uyu wa Kane tariki ya 30 Nyakanga 2026, ikipe ya Rayon Sports WFC ihagarariye u Rwanda mu majonjora ya ’CAF Women’s Champions League 2026’ yo mu karere ka CECAFA, yatomboye kuzahura na Yei Joint Stars, Mafunzo WFC na Denden FC mu Itsinda A.
Ni tombola yabereye muri Stade Amahoro, aho u Rwanda ruzakira imikino y’amajonjora y’uyu mwaka izitabirwa n’amakipe 10 yo mu karere ka Afurika y’Iburasirazuba n’iyo Hagati; arimo ayo muri Djibouti, Eritrea, Ethiopia, Kenya, u Rwanda, Sudani y’Epfo, Tanzania, Uganda, u Burundi na Zanzibar.
Rayon Sports WFC izaba iri mu itsinda A hamwe na Yei Joint Stars yo muri Sudan y’Epfo, Mafunzo WFC yo muri Zanzibar ndetse na Denden FC yo muri Eritrea; aho aya makipe azahatanira umwanya wa mbere uzayafasha kurenga amatsinda no gushaka itike y’iri rushanwa rihuza amakipe y’abagore meza ku Mugabane wa Afurika.
Mu yandi matsinda; Itsinda B rigizwe na Commercial Bank of Ethiopia FC (CBE), Kawempe Muslim Ladies yo muri Uganda ndetse na FC Ujeco yo muri Djibouti, mu gihe itsinda C ryo rigizwe na Simba Queens yo muri Tanzania, Kenya Police Bullets yo muri Kenya na Top Girls Academy yo mu Burundi.
Imikino y’amajonjora izabera i Kigali kuva ku wa 21 kugeza ku wa 31 Kanama 2026.
Simba Queens yo muri Tanzania na CBE yo muri Ethiopia, zombi zigeze kwegukana igikombe cya CECAFA Women’s Champions League.
Rayon Sports WFC na yo iri mu makipe azaba ahanzwe amaso, aho uretse gukinira imbere y’abafana bayo, yagarukiye ku mukino wa nyuma w’amajonjora ya CECAFA mu 2025, itsindwa na JKT Queens yo muri Tanzania igitego 1-0 ubwo iyi mikino yari yabereye muri Kenya.
Ikipe izitwara neza kurusha izindi muri aya majonjora ni yo izahagararira akarere ka CECAFA muri CAF Women’s Champions League 2026; gusa kugeza ubu CAF ntiratangaza igihe n’aho iri rushanwa rihuza amakipe yatwaye ibikombe mu bihugu byayo rizabera.
