Abayobozi muri Guverinoma y’u Rwanda n’iya Uganda, bahuriye i Kampala mu nama ya 12 ya Komisiyo ihoraho ihuriweho (Joint Permanent Commission – JPC), uru rukaba ari urubuga rukomeye rw’ibihugu byombi rugamije kongerera imbaraga ubufatanye mu nzego z’ingenzi.
Iyi nama y’iminsi itatu yatangiye kuri uyu wa Mbere tariki ya 20 Mata 2026, ibimburirwa n’inama y’abayobozi bakuru yahuje intumwa z’ibihugu byombi; aho intumwa z’u Rwanda ziyobowe n’Umuyobozi Mukuru ushinzwe Afurika muri Minisiteri y’Ububanyi n’Amahanga, Teta Gisa, mu gihe uruhande rwa Uganda ruhagarariwe na Ambasaderi Richard Kabonero, ukuriye ubufatanye mu by’ubukungu bw’akarere muri Minisiteri y’Ububanyi n’Amahanga y’iki gihugu.
Iyi nama itegura ibiganiro bizakurikiraho bigamije gusuzuma intambwe imaze guterwa kuva ku nama ya 11 ya JPC yabereye i Kigali mu 2023, ndetse no guteganya indi mirongo mishya y’ubufatanye.
Abayobozi bahagarariye ibihugu byombi bongeye gushimangira ubushake bwo kurushaho kunoza ubufatanye mu nzego zirimo ubwirinzi n’umutekano, ubucuruzi, iterambere ry’ibikorwaremezo, abimukira, uburezi no guteza imbere imibereho y’abaturage.
Nk’uko byatangajwe na Minisiteri y’ububanyi n’amahanga ya Uganda, ibi biganiro bizibanda no ku guteza imbere ubucuruzi n’ishoramari mu rwego rw’Umuryango wa Afurika y’Iburasirazuba; aho impande zombi zumvikanye ku gukemura ibibazo bikigaragara mu koroshya ubucuruzi, no guteza imbere ubufatanye mu nzego zirimo ubuhinzi, inganda, ubwubatsi n’ubukerarugendo.
Yagize iti “JPC2026 ya Uganda n’u Rwanda yagaragaje umubano wa kivadimwe uri hagati y’impande zombi n’ubushake bwa politiki buri hagati yabyo.”
Iyi nama izanaganira ku mishinga mishya ihuriweho y’iterambere no gusuzuma ishyirwa mu bikorwa ry’ibyemeranyijweho mbere, bigaragaza ubushake bukomeje bwo guhindura ibiganiro bya dipolomasi mo inyungu zigaragara mu bukungu.
Iyi nama kandi izakomereza ku ntambwe yagezweho mu nama zayibanjirije mu myaka ishize zirimo n’iya 11 yabereye i Kigali, aho zashimangiye gukuraho inzitizi ku misoro, koroshya urujya n’uruza ku mipaka, no kongera icyizere mu bucuruzi hagati y’ibihugu byombi.
JPC ni urubuga rwashyiriweho gukemura ibibazo hagati y’ibihugu byombi no guteza imbere ubufatanye.
