Ikigo cy’Igihugu gishinzwe guteza imbere iyoherezwa mu mahanga ry’ibikomoka ku Buhinzi n’Ubworozi (NAEB), cyatangaje ko umusaruro ukomoka ku buhinzi n’ubworozi byoherejwe ku masoko mpuzamahanga kuva ku wa 6-10 Mata 2026 byinjirije u Rwanda miliyari 11,2 Frw.
Umusaruro woherejwe ku isoko mpuzamahanga muri iyo minsi itanu ni toni 8837, zirimo iz’ikawa 31 zinjije miliyoni 51 Frw, toni 855 z’icyayi zinjije miliyari 3,5 Frw naho imboga zanganaga na toni 189 zinjije miliyoni 625 Frw.
Imbuto u Rwanda rwohereje ku isoko mpuzamahanga zipima toni 286, zinjije miliyoni 249 Frw, naho indabo zagurishijwe ni toni 12 zaguzwe miliyoni 86 Frw.
Ibihingwa bitandukanye (ibinyabijumba, ibinyamisogwe, ibinyampeke n’ibindi) bipima toni 7169, byinjirije u Rwanda miliyari 6,1 Frw.
Amatungo n’ibiyakomokaho byagurishijwe ni toni 259, yaguzwe miliyoni 623 Frw.
Umusaruro muri rusange wagurishijwe mu bihugu nk’u Bwongereza, u Buholandi, u Bufaransa, Leta Zunze Ubumwe z’Abarabu, u Budage, Nigeria n’ibihugu byo ku Mugabane wa Afurika.
