Gahunda y’imyaka itandatu yo kubungabunga ibidukikije mu karere k’Amayaga (‘Green Amayaga Project’) mu Ntara y’Amajyepfo y’u Rwanda, yazamuye imibereho y’abaturage barenga 400.000, mu gihe yanateje imbere ubuhinzi butangiza ikirere, hanatangwa amashyiga yo guteka akoresha ingufu nke, nk’uko imibare yatanzwe hasozwa uyu mushinga ibigaragaza.
Umushinga wa Green Amayaga (‘Green Amayaga Project’), washyizwe mu bikorwa hagati ya 2019 na 2025 mu turere tune tw’Intara y’Amajyepfo turimo Kamonyi, Ruhango, Nyanza, na Gisagara; wibanze kurwanya isuri, guteza imbere ubuhinzi no kubungabunga amashyamba.
Utu turere turi mu gace kitwa Amayaga kazwiho kuba ahantu hadatuwe cyane, kagira ubutaka bwuma cyane, kakagwamo imvura ishobora kwangiza ubutaka; ibi bikagira ingaruka ku musaruro, binaganisha ku kubona ibiribwa bihagije.
Imibare y’Ikigo gishinzwe kubungabunga ibidukikije mu Rwanda (REMA) igaragaza ko uyu mushinga wagiriye akamaro abantu bagera ku 415.780, barimo abagore bagera kuri 61% by’abitabiriye uyu mushinga; aho mu myaka itandatu wamaze watanze imirimo y’igihe gito ku baturage barenga ibihumbi ijana.
Ku baturage benshi, uyu mushinga wahinduye uburyo bakoragamo ubuhinzi ndetse n’imibereho yabo ya buri munsi.
Abahinzi bahawe amahugurwa n’ubufasha bwo gukora ubuhinzi bushingiye ku mihindagurikire y’ikirere, bifasha kugarura uburumbuke bw’ubutaka no kongera umusaruro; aho Hegitari zisaga 35.500 z’ubutaka zavuguruwe binyuze mu kububungabunga no kunoza tekiniki z’ubuhinzi, bituma umusaruro w’ubuhinzi wiyongeraho 25% ugereranije n’ibihe byashize.
Kurengera ibidukikije cyari ikintu cy’ingenzi cyibanzweho.
Hegitari zigera kuri 467 z’amashyamba karemano zarabungabunzwe muri uyu mushinga, mu gihe ingo zisaga 233.000 zahawe amashyiga yo guteka akoresha ingufu nke; hagamijwe kugabanya ikoreshwa ry’inkwi n’ihumana ry’ikirere, byafashije kugabanya imyuka ihumanya ikirere hafi toni 626.000, nk’uko REMA ibivuga.
Gutera ibiti ku buso bwa hegitari zisaga 37.000, byabaye kimwe mu byashowemo imari nini cyane muri uyu mushinga, ahatewe ibiti by’imbuto n’ibiti bihingwa, byitezweho gutanga umusaruro, aho abayobozi bavuga ko ibi biti bitazatanga inyungu mu gihe kirekire binyuze mu buhinzi bw’imbuto gusa, ahubwo bizananoza ubusugire bw’ubutaka no kurinda imyaka ikirere kibi.
Abashinzwe igenamigambi ry’ibidukikije bavuga ko umushinga wa Green Amayaga ugaragaza uburyo ibikorwa byo kubungabunga ibidukikije bishobora kujyana n’iterambere ry’ubukungu mu bice by’icyaro.
Ni mu gihe ku miryango yo mu karere k’Amayaga, inyungu zigaragaza zirimo kugira ubutaka bwiza, umusaruro mwiza, ibikoni bikoresha inkwi nke, ndetse n’impinduka z’ubuzima bw’abantu babayeho kubera ubuhinzi.
Source: Theforefrontmagazine
