Mu rwego rwo kongerera abahinzi b’ikawa ubushobozi no kuborohereza kubona ifumbire ku gihe, hashyizweho uburyo bushya bwo gutanga ifumbire bufite nkunganire ingana na 50%.
Ni gahunda yatangajwe nyuma yo gusinywa amasezerano y’ubufatanye hagati y’Ikigo cy’Igihugu gishinzwe guteza imbere ibikomoka ku buhinzi n’ubworozi byoherezwa mu mahanga (NAEB), Ihuriro ry’abohereza ikawa mu mahanga bakanayitunganya (CEPAR), hamwe n’Umuryango One Acre Fund-Tubura.
Aya masezerano yashyiriweho umukono kuri uyu wa Gatatu tariki ya 9 Nyakanga 2025, agamije gukomeza guteza imbere urwego rw’ubuhinzi bw’ikawa no kongera umusaruro w’ubwiza bujyanye n’isoko mpuzamahanga.
Kuva mu gihembwe cy’ihinga cya 2026A, ifumbire yo mu bwoko bwa `NPK 22-6-12+3S’ izatangira kugera ku bahinzi b’ikawa ibinyujijwe muri One Acre Fund-Tubura.
Igiciro cy’iyi fumbire ku muhinzi kizaba ari 796 Frw ku kilo, bingana na 50% y’igiciro nyirizina cy’ifumbire kingana na 1,592 Frw ku kilo. Ni ukuvuga ko andi mafaranga 50% azishyurwa na NAEB hamwe na CEPAR nk’inkunga izafasha mu kugabanya igiciro ku muhinzi.
Abahinzi b’ikawa bazatangira kubona iyi fumbire mu kwezi kwa Cyenda 2025, bikazabaha umwanya uhagije wo gutegura imirima yabo neza, bityo bakazayitera ku gihe mu rwego rwo kongera umusaruro.
Mu gutangiza iyi gahunda, Umuyobozi Mukuru wa NAEB, Claude Bizimana, yavuze ko ubu bufatanye bwerekana uburyo buhamye bw’igihugu bwo guteza imbere urwego rw’ubuhinzi bw’ikawa.
Yagize ati:
“Iyi gahunda ishyiraho uburyo burambye bwo gufasha abahinzi kubona ifumbire nziza kandi ku gihe. Twizeye ko abahinzi bazabyaza aya mahirwe umusaruro, kuko gukoresha ifumbire neza byongera umusaruro w’ikawa ndetse bikazamura n’ubwiza bwayo, bigafasha n’iterambere ryabo.”
Umuyobozi Mukuru wa One Acre Fund-Tubura, Belinda Bwiza, na we yashimangiye ko iyi gahunda ari urugero rw’ubufatanye bufatika hagati ya Leta, abikorera n’abandi bafatanyabikorwa.
Ati:
“Aya masezerano ni ikimenyetso cy’uko iyo inzego zifatanyije, iterambere rigerwaho vuba. Ubu bufatanye buzafasha kongera umusaruro w’ikawa y’u Rwanda no kuzamura imibereho y’abahinzi.”
Abahinzi b’ikawa basabwe gutangira kwitegura, bakorana n’inganda zitunganya ikawa ndetse n’abakangurambaga ba One Acre Fund-Tubura bo mu turere tubegereye, kugira ngo bazabashe kubona iyi fumbire ku gihe kandi bazayikoreshe neza.
Nta fumbire y’ubuntu izatangwa muri gahunda nshya, bityo abahinzi barasabwa kubigira ibyabo hakiri kare, bakirinda gutungurwa igihe kigeze.
