Indege nshya, ibihembo, n’icyerekezo gishya bigaragaza iterambere rya RwandAir
Nyuma yo kwegukana igihembo cya Skytrax World Airline Awards 2025 nk’isosiyete nziza mu bwikorezi bwo mu kirere muri Afurika, RwandAir irakataje mu rugendo rwo kuba indashyikirwa. Ubuyobozi bwayo buvuga ko ibi byose ari umusaruro w’ubunyamwuga n’ubwitange by’abakozi bayo, ndetse n’ubufatanye bwa hafi n’inzego za Leta z’u Rwanda.
Mu kiganiro kirambuye, Umuyobozi Mukuru ushinzwe Ubucuruzi wa RwandAir, Fouad Caunhye, yagaragaje neza ishusho y’aho RwandAir iva n’aho yerekeza.
Igihembo cya Skytrax n’icyo kivuze ku Rwanda
Fouad avuga ko kwegukana igihembo cya sosiyete nziza ya mbere muri Afurika kidashimisha gusa RwandAir ahubwo ari ishema ku gihugu cyose.
“Ni ikimenyetso cy’uko Leta y’u Rwanda iduha icyizere gikomeye. Turi isosiyete ifasha igihugu guhuza n’Isi, tukazana ba mukerarugendo, abashoramari n’amahirwe mu gihugu. Iki gihembo rero ni ikimenyetso cy’uko ibyo dukora bifite agaciro.”
Yongeraho ko nubwo RwandAir itari nini mu rugero rw’ibikoresho n’imari, igira icyo yirusha nyinshi: serivisi zinoze, umutekano usesuye no gushyira imbere umugenzi.
Airbus nshya, Boeing nshya n’icyerekezo kinini
Ubu RwandAir iritegura kwakira Airbus A330 ya kane muri Kanama uyu mwaka, bikazakurikirwa n’indi Boeing 737 ebyiri mu kwezi kwa Kanama na Nzeri.
“Mbere y’uko Nzeri irangira, tuzaba twamaze kongera ubushobozi cyane. Ibi bizatuma ‘seat kilometer’ zacu ziyongera hagati ya miliyoni 100 kugera kuri miliyoni 600, izamuka rya 15–20%,” asobanura Fouad.
Intego y’iyi sosiyete ni ukugira Kigali nk’uko Dubai imeze muri Aziya n’Afurika y’Amajyaruguru—igicumbi gikomeye gihuza imigabane, kikaba icyambu kinini cy’indege n’ubukungu.
Ikibuga cya Bugesera gishobora guhindura amateka
Ikibuga cy’Indege cya Bugesera gitegerejweho kugabanya umuvundo kuri Kanombe, kikazajya cyakira miliyoni 8–10 z’abagenzi ku mwaka ugereranyije na miliyoni 3 zishobora kwakirwa ubu. Fouad yemeza ko ari cyo kizahindura byinshi mu mikino.
“Ni cyo kizadushyira ku rwego rwisumbuye. Kigali izahita iba isoko rikomeye muri Afurika yose. Tuzashobora guhangana neza n’ibindi bibuga bikomeye ku mugabane.”
Ibi byose bizongera urujya n’uruza rw’abashoramari, ba mukerarugendo n’ibicuruzwa, bikazamura umusaruro w’igihugu.
Ubufatanye na Qatar Airways: inyungu nyinshi ku Banyarwanda
Kuva RwandAir yatangira gukorana na Qatar Airways binyuze mu masezerano ya codeshare, Kigali yabaye igicumbi gifasha abagenzi kugera ku Isi hose. Ibi bifasha abanyarwanda n’abandi banyafurika kubona amahirwe menshi yo kwinjira mu masoko mashya.
“Qatar Airways ni sosiyete mpuzamahanga ikomeye, ikorana natwe mu myitozo, ubuyobozi n’ikoranabuhanga. Si ubucuruzi gusa, ahubwo ni iterambere rirambye.”
Uburyo bushya bwo gukora: ikoranabuhanga n’ibidukikije
RwandAir yamaze gushyira imbere gahunda yo kugabanya impapuro, kongera gukoresha ikoranabuhanga ku buryo umugenzi ashobora kugura itike, kwiyandikisha no guhitamo intebe byose kuri telefone. Irimo no kugabanya imyuka ihumanya, ndetse indege nshya zayo zifite moteri zigezweho zifasha kuzigama lisansi.
Guteza imbere abagore n’urubyiruko, n’iby’ubwikorezi bw’ibintu
RwandAir ni imwe mu zifite abapilote b’abagore benshi muri Afurika, ikanagira abayobozi b’abagore ku rwego rwo hejuru. Yashyizeho kandi gahunda zo gufasha abanyeshuri n’urubyiruko kwinjira mu bijyanye n’ubwikorezi bwo mu kirere.
Mu bwikorezi bw’ibintu, iyi sosiyete irateganya kongera indege nini z’ubwikorezi (freighters) zitwara ibintu bikagera ku masoko yo mu Burayi, Aziya no mu Burasirazuba bwo Hagati, cyane cyane ibyoherezwa n’u Rwanda n’akarere k’Ibiyaga Bigari.
Fouad avuga ko ubu sosiyete imwe gusa muri Afurika ari yo ibasha kubona inyungu z’amadolari miliyari ku mwaka, abandi bose baracyari hasi ya miliyoni 700. Ibi bisobanura ko isoko ry’Afurika rigifite amahirwe menshi.
“Afurika iracyari mu cyiciro cya kabiri cy’iterambere, ubwikorezi bwo mu kirere bugiye kuba ingenzi cyane. Turiteguye gufata ako kanya, duhereye kuri RwandAir.”
