Abakinnyi babiri bakiri bato b’Abanyarwanda bagiye muri Canada guhagararira igihugu mu Marushanwa y’Isi ya UCI yo gusiganwa ku magare 2026 (2026 UCI Road World Championships), ariko ntibasubiranye na bagenzi babo mu gihugu ubwo itsinda bari bajyanye ryasubiraga mu Rwanda.
Abo bakinnyi ni Kevin Nshutiraguma wasiganwaga mu batarengeje imyaka 23 (under 23) na Pacifique Byusa wahatanaga mu bafite imyaka 17-18 (juniors), bakaba bataragarukanye na delegasiyo y’igihugu nyuma y’Amarushanwa y’Isi yo gusiganwa ku magare yabereye i Montréal muri Canada kuva tariki20 kugeza ku ya 27 Nzeri 2026.
Ikinyamakuru Rwanda Dispatch cyagaragaje ko Ishyirahamwe ry’umukino wo gusiganywa ku magare mu Rwanda (FERWACY) ritaratangaza ku mugaragaro ibisobanuro birambuye kuri iki kibazo; mu gihe Minisiteri ya Siporo yatangaje ko iri gukorana n’abashinzwe abinjira n’abasohoka muri Canada ndetse na Ambasade y’u Rwanda muri icyo gihugu kugira ngo hamenyekane ibyabaye.
Kevin Nshutiraguma ni nde?
Nshutiraguma yavukiye i Musanze mu 2006, atangirira gukina umukino wo gusiganwa ku magare mu ikipe ya Cine Elmay/Rafiki Bike Cycling Club.
Yigaragaje mu marushanwa y’abato, aza no kwegukana icyiciro cy’abatarengeje imyaka 23 muri Heroes Cycling Race 2025, mu gihe mu ntangiriro za 2025, yerekeje muri Kenya muri Team Amani yo muri Kenya, ikaba iri ku rwego mpuzamahanga (UCI Continental).
Nyuma y’amezi make, Nshutiraguma yatandukanye n’iyi kipe ku bwumvikane; atangaza ko hari ibibazo bijyanye n’ubwishyu n’ibikoresho itubahirije, agaruka muri Cine Elmay/Rafiki Bike Cycling Club.
Mu 2026, yakomeje guhagararira u Rwanda mu marushanwa mpuzamahanga, arimo nka Tour d’Algérie, aho yasoreje ku mwanya wa 55 ku rutonde rusange.
Muri Montréal, yabaye uwa 53 mu gusiganwa n’isaha ku muntu ku giti cye (individual time trial-ITT) mu cyiciro cy’abatarengeje imyaka 23, gusa ntiyarangiza isiganwa ry’amagare yo mu muhanda.
Pacifique Byusa we ni nde?
Pacifique Byusa yavukiye i Kayonza ku wa 30 Nyakanga 2008, akaba akinira ikipe ya Les Amis Sportifs yo mu Karere ka Rwamagana.
Ni umwe mu bakinnyi bato bagaragaje impano mu Rwanda, aho yegukanye Rwanda Youth Racing Cup 2025 mu cyiciro cy’abafite imyaka 17-18 (junior), ndetse anegukana isiganwa ry’iki cyiciro mu marushanwa y’igihugu yo mu 2026.
Byusa kandi yari amaze guhagararira u Rwanda mu Marushanwa y’Isi inshuro ebyiri. Muri Montréal 2026, yabaye uwa 64 mu isiganwa ryo kurwanya isaha ku giti cye mu cyiciro cya Junior.
Byagenze bite ngo batoroke?
Amakuru y’abantu bari hafi ya delegasiyo avuga ko Byusa ari we wabanje kuva aho ikipe yari icumbitse, aho nyuma y’isiganwa yagiye kwitunganya ariko ntiyagaruka.
Nshutiraguma na we yaje kuva muri hoteli ahagana saa moya za mu gitondo, mu gihe bagenzi be bari bakiryamye.
Umuyobozi wa Les Amis Sportifs, Yousuf Sebugwiza, yabwiye Rwanda Dispatch ko ikipe ye yabonaga Byusa nk’umukinnyi w’umunyamwete kandi wizewe. Yavuze kandi ko mbere y’uko yitabira iri rushanwa mpuzamahanga, iyi kipe yari yaraganirije abakinnyi ku ngaruka zo gutandukana na delegasiyo bari mu mahanga.
Hari amakuru avuga ko Byusa ashobora kuba yari afite umuntu azi muri Canada, ariko nta bimenyetso bifatika byashyizwe ahagaragara byemeza koko ko ari byo.
Ni mu gihe kugeza ubu, aho Nshutiraguma na Byusa bari ndetse n’impamvu nyayo yatumye batandukana na delegasiyo y’u Rwanda ntibiramenyekana ku mugaragaro, gusa Minisiteri ya Siporo ikavuga ko iperereza rigikomeje.
