Ingabo z’u Rwanda ziri mu butumwa bwo kubungabunga amahoro muri Sudani y’Epfo (RWANBATT-3 na RAU-13) zambitswe imidali y’ishimwe n’Umuryango w’Abibumbye (LONI) nk’ikirenga cy’ishimwe ku bwitange, ubunyamwuga n’ubushake bwo gukorera mu mutuzo n’ubunyangamugayo muri iki gihugu cyari kimaze igihe mu makimbirane.
Umuhango wo kubambika iyi midali wabereye i Durupi, hafi y’umurwa mukuru wa Juba, witabirwa n’abayobozi bakuru ba LONI, abasirikare baturutse mu bihugu bitandukanye, ndetse n’abahagarariye Guverinoma ya Sudani y’Epfo.
Mu ijambo rye, Umugaba Mukuru w’Ingabo za LONI muri Sudani y’Epfo, Lt Gen Mohan Subramanian, yashimye cyane abari mu ngabo z’u Rwanda ku rwego rw’ubunyamwuga bagaragaza n’imyitwarire itajegajega mu bikorwa byo kubungabunga amahoro. Yibukije ko u Rwanda ruza mu bihugu bitanu bya mbere ku Isi bitanga ingabo nyinshi mu bikorwa bya LONI byo kubungabunga amahoro, ashimangira ko ibyo bigaragaza ubushake bw’u Rwanda mu kurengera ubuzima bw’abaturage b’Isi.
Yagize ati: “Ingabo z’u Rwanda zigaragaza umurava n’ubwitange by’ukuri. Imikorere yazo myiza yatumye zigirira icyizere abaturage ndetse n’abandi bafatanyabikorwa bose.”
Ku ruhande rwe, Umuyobozi w’Ingabo z’u Rwanda zikorera muri Sudani y’Epfo, Col Leodomir Uwizeyimana, yashimiye ubufatanye hagati y’Ingabo z’u Rwanda, abaturage ba Sudani y’Epfo ndetse n’ingabo z’ibindi bihugu biri muri ubu butumwa.
Yavuze ko ubufatanye n’imikoranire myiza byabafashije kurangiza inshingano zabo neza, ashimira abasirikare b’u Rwanda ku bushake, umurava n’ubupfura bagaragaje mu gihe cyose bamaze mu bikorwa byo kurinda abaturage n’ibyabo.
Col Uwizeyimana yongeye gushimangira ko Ingabo z’u Rwanda zizakomeza guhagararira neza igihugu, zirinda amahoro n’umutekano nk’uko zisabwa n’amasezerano ya LONI, kandi zikomeza kuba icyitegererezo mu bikorwa byo kubaka amahoro arambye ku mugabane wa Afurika.
