Ku wa Gatandatu, tariki ya 24 Gicurasi 2025, BK Arena yongeye kuba igicumbi cy’ibyishimo n’imyidagaduro, ubwo abahanzi Bruce Melodie na BNXN (wahoze azwi nka Buju) bataramiraga abafana bari bitabiriye imikino ya Basketball Africa League (BAL) 2025, by’umwihariko umunsi wa gatanu wa Nile Conference.
Bruce Melodie yigaragaje nk’umunyabigwi mu muziki nyarwanda
Bruce Melodie, umwe mu bahanzi bakunzwe cyane mu Rwanda no mu karere, yinjiriye ku rubyiniro ahagana saa 8:30 z’umugoroba, aserukanye n’ababyinnyi benshi bambaye imyambaro y’umweru n’umukara, bituma abafana bamwakirana amashyi menshi.
Yatangiye aririmba indirimbo ye “Bado”, akomereza ku ndirimbo zakunzwe nka “Ikinya”, “Ikinyafu”, “When She’s Around” yakoranye na Shaggy, ndetse na “Katerina” yatumye abafana bose bahaguruka.
Yaririmbye kandi “Katapila”, “Saa Moya”, “Rosa” iri kuri album ye nshya “Colourful Generation”, “Fou de Toi”, “Igitangaza”, “Sawa Sawa”, “Kungola” na “Henzapu” yasorejeho.
BNXN yerekanye ubuhanga bwe mu njyana ya Afrobeat
Nyuma ya Bruce Melodie, BNXN wo muri Nigeria yinjiriye ku rubyiniro, asusurutsa abafana mu ndirimbo ze zakunzwe nka “Bae Bae” yakoranye na Ruger, “Ole”, “Phenomena”, “Outside”, “Finesse” yakoranye na Pheelz, ndetse na “Gwagwalada” yakoranye na Kizz Daniel na Seyi Vibez.
Igitaramo cyakurikiye umukino wa Al Ahli Tripoli na APR BBC
Iki gitaramo cyabaye nyuma y’umukino wahuje Al Ahli Tripoli na APR BBC, aho Al Ahli yatsinze APR BBC ku manota 106-102.
Imikino ikurikira
Ku Cyumweru, tariki ya 25 Gicurasi 2025, hateganyijwe imikino ikurikira:
- Al Ahli Tripoli izahura na MBB yo muri Afurika y’Epfo saa 14:30.
- APR BBC izahura na Nairobi City Thunder saa 17:30.
Iyi mikino izaba ari iya nyuma mu matsinda ya Nile Conference, aho amakipe azaba arwana no kubona itike yo gukomeza mu mikino ya nyuma izabera muri Pretoria, Afurika y’Epfo, kuva tariki ya 6 kugeza 14 Kamena 2025.
Igitaramo cyabaye igikorwa cy’ingenzi mu guhuza siporo n’imyidagaduro, kigaragaza uburyo BAL ikomeje guteza imbere umuco n’ubuhanzi muri Afurika.
