Guhera ku wa Gatanu tariki ya 15 kugeza ku Cyumweru tariki 17 Ugushyingo 2024, mu Karere ka Gisagara mu nzu y’imikino (Gymnase) y’Akarere ndetse mu nzu y’imikino ya Kaminuza y’u Rwanda, ishami rya Huye hazabera imikino ya shampiona ya Volleyball y’umunsi wa gatatu haba mu bagabo n’abagore.

Ni nyuma y’agace ka mbere k’imikino ya Volleyball yo kumucanga (Beach Volleyball) ndetse n’akaruhuko gato ku makipe asanzwe akina shampiyona ya Volleyball mu Rwanda; aho mu mpera z’iki cyumweru imikino yiganjemo iy’abagore izabera mu nzu y’imikino ya Kaminuza y’u Rwanda, naho imikino yiganjemo iy’abagabo ikazabera mu nzu y’imikino yo mu Karere ka Gisagara.

Umunsi wa gatatu uzarangwa n’imwe mu mikino ikomeye yaba mu bagabo ndetse n’abagore; aho mu mikino yitezwe cyane harimo izahuza amakipe ya Kepler ndetse na APR VC mu bagabo n’abagore, imikino yombi ikazaba kuwa Gatanu tariki ya 15 Ugushyingo mu Karere ka Gisagara.

Indi mikino itegerejwe ni nk’umukino uzahuza ikipe ya Police VC itaratsindwa umukino n’umwe ndetse na Gisagara VC izaba iri imbere y’abafana bayo, ndetse na East African University Rwanda nayo itaratsindwa izakina na REG VC yatangiye nabi.

Kugeza ubu amakipe ya Police y’abagabo n’abagore niyo ayoboye urutonde rwa shampiyona nyuma y’iminsi ibiri imaze gukinwa; aho mu bagabo Police VC ifite amanota 6 inganya na EAUR VC, Gisagara VC ku mwanya wa kabiri n’amanota 3 inganya na Kepler VC ndetse na REG VC, ni mu gihe mu bagore Police WVC iyoboye n’amanota 8 ikaba ikurikiwe na RRA WVC ifite amanita 6, naho APR WVC ikaba iri ku mwanya 3 n’amanota 4.