Ikipe y'igihugu y'u Rwanda mu mupira w'amaguru 'Amavubi' itozwa n'Umudage Frank Torsten Spittler, imaze iminsi yitabira amarushanwa atandukanye; aho imibare igaragaza ko kuva uyu mutoza yayifata yitwaye neza kurusha undi uwo ari we wese wayitoje.

Mu mikino Frank Torsten Spittler amaze gutoza Amavubi y'u Rwanda imikino 14 mu marushanwa atandukanye, aho yayafashije gutsindamo imikino itandatu, anganya ine anatsindwa indi ine.

Spittler n'abasore be, bamaze iminsi bakina imikino itandukanye yo gushaka itike yo kwitabira imikino yaba iy'igikombe cy'Afurika (CHAN), imikino y'igikombe cy'Isi banagikomeje guhatanira kimwe n'imikino nyafurika ihuza abakinnyi bakina imbere mu bihugu byabo izwi nka CHAN.

Kuri uyu wa Mbere tariki 18 Ugushyingo 2024, Torsten Spittler n'abasore bitwaye neza batsindira igihange Nigeria iwacyo ibitego bibiri kuri kimwe, gusa ibi ntibyari bihagije ngo Amavubi yitabire igikombe cy'Afurika nyuma y'imyaka 20, kuko inshuro imwe rukumbi bacyitabiriye byari mu mwaka wa 2004. 

Byasabaga ko Libya yadutesheje amanota ndetse inzozi zo kwitabira iki gikombe zigasa n'iziyoyotse, idutsindira Benin yari yakiriye i Tripoli, gusa biza kurangira banganyije ubusa ku busa bituma u Rwanda na Benin banganya amanota 8, ariko nta gitego izigamye nta n'umwenda ifite, mu gihe Amavubi yari afite umwenda w'ibitego bibiri asigara atyo.

Umutoza Spittler yagiye avuga ko "inkweto ze zishaje"; bityo ashaka guhagarika gutoza, gusa abantu bamwe bakagaragaza ko agikenewe mu Mavubi y'u Rwanda bagendeye ku musaruro utarigeze ugerwaho n'undi uwari we wese watoje Amavubi; ni mu gihe ariko hari n'abavuga ko atoroshye kuko hari abakinnyi batumvikanye nawe bavanwa mu ikipe y'igihugu kandi bigaragara ko bagikenewe.

Ni mu gihe ariko n'ubwo u Rwanda rwabuze amahirwe yo kwerekeza mu gikombe cy'Afurika (CAN) kizabera muri Maroc mu mwaka utaha wa 2025, hari amahirwe ko rwajya mu gikombe cy'Isi ndetse rukaba rwanakwitabira imikino ya CHAN, kuko urugamba rwo gushaka ayo matike rugikomeje.

Kugeza ubu nyuma y'imikino ine mu gushaka itike y'igikombe cy'Isi 2026 kizabera muri Canada, Mexique na USA; u Rwanda ruyoboye itsinda rya 3 (C) ruherereyemo n'amanota 7 runganya na Afurika y'Epfo na Benin, hakaza Lesotho ifite amanota 5, Nigeria ikagira 3 naho Zimbabwe iri ku mwanya wa nyuma n'amanota 2.

Ni mu gihe kandi nyuma yo gusezerera Djibouti ku giteranyo cy'ibitego bitatu kuri kimwe, mu cyiciro gikurikiraho u Rwanda rufite umukino wo gushaka itike y'igikombe cy'Afurika gihuza amakipe y'igihugu ku bakinnyi bakina imbere mu bihugu byabo (CHAN); imikino iteganijwe kuzabera muri Uganda, Tanzania na Kenya muri Gashyantare umwaka utaha wa 2025.