Taekwondo: Dream Taekwondo Club yatanze imikandara itandukanye ku bantu bagera kuri 70
![Taekwondo: Dream Taekwondo Club yatanze imikandara itandukanye ku bantu bagera kuri 70](https://umusarenews.com/public/default-image/default-730x400.png )
Ku wa Gatandatu tariki 08 Kamena 2024, Dream Taekwondo Club isanzwe ikorera mu Gatenga yatanze imikandara itandukanye ku bantu bagera kuri 70 barimo abakiri bato n'abakuru; ubuyobozi bw'iyi kipe busaba by'umwihariko ibigo by'amashuri kwitabira uyu mukino.
Ni igikorwa cyitabiriwe n'abana bakiri bato kuva ku myaka 5 bagera kuri 50 bo mu bigo by'amashuri bya GS Gatenga, GS Murambi na Don Bosco Gatenga ari naho byabereye, mu gihe abandi bagera kuri 20 ari abakuze baturutse mu makipe atandukanye.
Mu midari yatanzwe, harimo 10 y'umutuku, imidari 10 y'ubururu, hakaba imidari 15 y'icyatsi ndetse n'imidari 35 y'umuhondo; aho itangwa ryayo ryanitabiriwe n'Umutoza w'amakipe y'igihugu (ibyiciro bitandukanye) mu mukino wa Taekwondo, umunya-Korea y'Epfo Master Ntwari Ji-Man Jeong.
Umuyobozi wa Dream Taekwondo Club, Master Ntawangundi Eugene, avuga ko iki gikorwa bagikora bafatanije n'Ishyirahamwe ry'umukino wa Taekwondo mu Rwanda (Rwanda Taekwondo Federation-RTF), mu rwego rwo kongera umubare by'umwihariko mu bakiri bato.
Yagize ati: "Dufatanya na Federation, ubu abana benshi twigisha baturuka mu bigo by'amashuri byegereye Don Bosco ahazwi nko kwa Carlos ari naho dukorera, turashishikariza n'ibindi bigo by'amashuri kugira amakipe ya Taekwondo, na cyane ko umwaka utaha Federation ifite gahunda yo gutangiza amarushanwa y'ibigo, kandi nayo ishishikariza amashuri kugira amakipe; bizatuma uyu mukino utera imbere mu mashuri, hanaboneke urubyiruko rwinshi ruwukina."
Dream Taekwondo Club yatangiye mu mwaka wa 2011 ari nabwo yatangiye gutanga imidari ku banyeshuri bayo, aho kugeza ubu mu mfura zayo harimo abageze kuri Dani ya 4, dore ko bategura ibizamini by'imidari nibura kabiri mu mwaka.
Ni mu gihe kugeza ubu iyi kipe kuva yashingwa imaze gutwara ibikombe bigera kuri 26 mu marushanwa atandukanye ategurwa n'Ishyirahamwe ry'umukino wa Taekwondo mu Rwanda, mu gihe kugeza ubu ifite abanyamuryango bagera kuri 90.
![Taekwondo: Dream Taekwondo Club yatanze imikandara itandukanye ku bantu bagera kuri 70](https://umusarenews.com/public/default-image/default-730x400.png )
![Taekwondo: Dream Taekwondo Club yatanze imikandara itandukanye ku bantu bagera kuri 70](https://umusarenews.com/public/default-image/default-730x400.png )
![Taekwondo: Dream Taekwondo Club yatanze imikandara itandukanye ku bantu bagera kuri 70](https://umusarenews.com/public/default-image/default-730x400.png )
![Taekwondo: Dream Taekwondo Club yatanze imikandara itandukanye ku bantu bagera kuri 70](https://umusarenews.com/public/default-image/default-730x400.png )
![](https://umusarenews.com/public/default-image/user.jpg)
Jonathan Habimana
Comment / Reply From
You May Also Like
Popular Posts
Newsletter
Subscribe to our mailing list to get the new updates!