Football: Amakipe ahagarariye u Rwanda ntiyahiriwe mu mikino Nyafurika ibanza
Mu mpera z’iki Cyumweru tariki 17 na 18 Kanama 2024, amakipe ahagarariye u Rwanda mu mikino y’Afurika (CAF Champion League na Confederation Cup) yakinaga, Police FC itsindirwa muri Algeria, APR FC nayo biba uko muri Tanzania.
Police FC yatwaye igikombe cy’Amahoro niyo yabanje gukina ku wa Gatandatu tariki 17 Kanama 2024 na CS Constantine yo muri Algeria mu mikino y’amakipe yatwaye ibikombe iwayo (CAF Confederation Cup); umukino urangira CS Constantine yari mu rugo itsinze Police ibitego 2 ku busa.
Ni mu gihe kuri iki Cyumweru tariki 18 Kanama 2024, APR FC yatwaye shampiyona y’u Rwanda nayo yamanutse mu kibuga ikina na Azam FC yo muri Tanzania mu mikino y’amakipe yabaye aya mbere iwayo; aho umukino warangiye Azam yari mu rugo ibonye intsinzi y’igitego 1 ku busa, cyabonetse ku munota wa 55 kuri penaliti yatewe n’Umunya- Colombia Jhonier Blanco.
Imikino yo kwishyura iteganijwe kubera i Kigali hagati ya tariki 24 na 25 Kanama 2024; aho kuri Kigali Pele Stadium Police FC ifite akazi katoroshye ko gutsinda CS Constantine ikinyuranyo cy’ibitego 3, mu gihe kuri Stade Amahoro, APR FC nayo isabwa kuzatsinda Azam FC ikinyuranyo cy’ibitego nibura 2; kugira ngo aya makipe y’abashinzwe umutekano mu Rwanda abashe gukomeza.
