Rayon Sports WFC yanyagiye AS Kigali WFC yegukana igikombe kiruta ibindi
Ku gicamunsi cyo kuri uyu wa Kane tariki 26 Nzeri 2024, ikipe ya Rayon Sports y'abagore yatsinze AS Kigali ibitego 5 kuri 2 yegukana igikombe kiruta ibindi (FERWAFA Super Cup 2024).
Ni mu mukino wabereye kuri Kigali Pele Stadium uhuza Rayon Sports WFC yatwaye shampiyona n'igikombe cy'amahoro na AS Kigali yabaye iya kabiri muri shampiyona inatsindirwa ku mukino wa nyuma w'igikombe cy'amahoro; mu gihe ubusanzwe umukino w'igikombe kiruta ibindi ukinwa n'ikipe yatwaye shampiyona n'iyatwaye igikombe cy'amahoro.
Muri uyu mukino, ikipe ya AS Kigali WFC yasoje igice cya mbere iwuyoboye kuko yari ifite ibitego bibiri kuri kimwe, gusa mu gice cya kabiri ikibuga kiyicuramiraho kuko yatsinzwemo ibitego bine byose, yo ntiyongera kureba mu izamu rya Rayon Sports WFC.
Mu batsindiye Rayon Sports WFC harimo Gibi Mary Chavinda ukomoka muri Malawi watsinze ibitego bibiri bya mbere, Umunyakenya Rachael Muema Otolo watsinze icya gatatu, Khadidja Muhawenimana atsinda icya kane, mu gihe Jeanine Mukandayisenga uzwi nka 'KaBoy' ari we watsinze icy'agashinguracumu; mu gihe bibiri bya AS Kigali WFC byatsinzwe na Iradukunda Callixte na Nguema Odette.
Amwe mu mafoto:
