Imbamutima za Minisitiri Nduhungirehe witabiriye umukino wa Rayon Sports na Kiyovu SC
Minisitiri w'ububanyi n'amahanga n'ubutwererane, Ambasaderi Olivier Nduhungirehe, asanga umupira w'u Rwanda ukeneye uguhangana nk'uko Kiyovu Sports yagaragaye mu gice cya mbere, akanishimira ubumwe yabonye muri Rayon Sports.
Ibi Minisitiri Amb. Nduhungirehe yabigarutseho nyuma yo kureba umukino wahuje Rayon Sports na Kiyovu Sports muri shampiyona y'u Rwanda (Rwanda Premier League), ku mugoroba wo kuri uyu wa Gatandatu tariki 02 Ugushyingo 2024; urangira Rayon Sports inyagiye Kiyovu Sports ibitego bine ku busa.
Abinyujije ku rubuga rwa X, Amb. Olivier Nduhungirehe usanzwe uzwiho kuba umukunzi wa Mukura Victory Sports yagize ati:
"Wari umukino ukomeye, imbaraga nyinshi, ibitego byiza; ikiruta byose ibyishimo by'umwihariko n'ubumwe n'ubusabane hagati y'abakinnyi, abayobozi n'abafana ba Rayon Sports. Mwakoze ndabashimiye #Gikundiro."
Minisitiri w'ububanyi n'amahanga n'ubutwererane yongeyeho ati:
"Uyu mukino w'abakeba wo ku rwego rwo hejuru, wagaragaje ikipe ya Kiyovu Sports yagerageje kurwana mu gice cya mbere. Ibi nibyo umupira w'u Rwanda ukeneye kugira ngo uzamure ishyaka ry'abafana."
Ni mu gihe n'ubwo Amb. Nduhungirehe avuga ibi, uyu mukino wasize ikipe ya Kiyovu Sports ikomeje kuba habi kuko kugeza ubu iri ku mwanya wa nyuma n'amanota 3 n'umwenda w'ibitego 13, mu gihe Rayon Sports yo iri ku mwanya wa kabiri n'amanota 14, aho irushwa inota rimwe na Police FC.
