Football: Amavubi y’u Rwanda yagize amanota 1130.4, azamuka ku rutonde rwa FIFA
Ku wa Kane tariki 24 Ukwakira 202, Ishyirahamwe Mpuzamahanga ry’Umupira w’Amaguru ku Isi (FIFA) ryatangaje urutonde ngarukakwezi rw’uko amakipe y’ibihugu ahagaze ku Isi; u Rwanda ruzamuka imyanya igera kuri ine.
Ikipe y’Igihugu y’u Rwanda (Amavubi) yazamutseho imyanya ine kuri uru rutonde, aho rwavuye ku mwanya wa 130 rugera ku mwanya w’126 ku Isi n’amanota 1130.4.
Ni mu gihe muri uku kwezi, Amavubi yatsinzwe na Bénin ibitego 3-0 mu mukino ubanza mu gushaka itike y’Igikombe cya Afurika wabereye muri Côte d'Ivoire, nayo aza gutsinda uwo kwishyura ibitego 2-1 mu mukino wabereye kuri Stade Amahoro.
Kugeza ubu Argentine iracyayoboye uru rutonde, igakurikirwa n’u Bufaransa, mu gihe Maroc ikaba ari yo iza hafi mu bihugu byo mugabane wa Afurika, aho iri ku mwanya wa 13, naho Sénégal ikaza ku mwanya wa 20 ku Isi.
