Minisiteri y’Ubuhinzi n’Ubworozi (MINAGRI) ku bufatanye na Minisiteri y’Uburezi (MINEDUC) yatangije gahunda nshya igamije kongera imbaraga mu mirire y’abanyeshuri binyuze mu gukoresha ibishyimbo byongerewe intungamubiri. Ibi bishyimbo bikungahaye cyane ku butare na zinc, intungamubiri zifasha abana mu mikurire no mu mikorere y’ubwonko.
Guverinoma isaba ibigo by’amashuri gutangira kubikoresha mu mwaka w’amashuri wa 2025/2026 uzatangira muri Nzeri, nk’intambwe yo gushyira mu bikorwa gahunda yo kugaburira abanyeshuri ku mashuri hagamijwe kurwanya imirire mibi no kunoza ireme ry’uburezi.
Ibi bishyimbo byabonywe binyuze mu buhinzi bugezweho (biofortification), aho byahujwe n’indyo gakondo y’Abanyarwanda kugira ngo habeho imbuto nshya ikize ku butare na zinc. Biteganyijwe ko iyi gahunda izagera ku bigo byinshi by’amashuri nyuma y’uko ishyirwa mu bikorwa bwa mbere muri gahunda y’imyaka itatu ya Sustainable School Feeding Innovations in Kigali (SSFI) yatangiye mu 2024. Kugeza ubu, abana 277,566 bo mu mashuri 195 yo mu Mujyi wa Kigali bamaze kugerwaho.
Raporo ya SSFI igaragaza ko 73% by’amashuri amaze gushyiraho imirima y’ibi bishyimbo, ibyo bikaba ari intambwe yerekana ko gahunda izaramba. Sam Ngabire, umukozi muri MINEDUC ushinzwe gahunda yo kugaburira abanyeshuri, yavuze ko ibigo byinshi byamaze kubona imbuto ndetse byatangiye kuziyobora mu mirima yabyo.
Minisitiri w’Ubuhinzi, Dr Mark Cyubahiro Bagabe, yavuze ko iyi gahunda iri mu murongo mugari wa Guverinoma wo guteza imbere ibihingwa bifite intungamubiri, bikaboneka mu buryo burambye kandi bigatanga umusaruro mwinshi.
U Rwanda rufite umuco wo kurya ibishyimbo cyane, aho umuntu umwe abarirwa gukoresha ibilo 34 ku mwaka. Ibi bishyimbo byongerewe intungamubiri bikaba biteganyijwe kuzamura ubuzima bw’abana n’imiryango muri rusange, binyuze mu kongera imbaraga z’umubiri n’ubwenge bw’abanyeshuri.
