Volley ball: Amakipe 20 yo mu Rwanda no mu mahanga azitabira GMT 2023 yamenyekanye
Amakipe azitabira imikino yo Kwibuka Jenoside yakorewe Abatutsi mu 1994 (Genocide Memorial Tournament 2023-GMT 2023) yamenyekanye; aho amakipe 20 yo mu bihugu bitatu ariyo yemeye ubutumire.
Ni imikino iteganijwe kubera i Kigali mu Rwanda ku wa Gatandatu tariki 24 no ku Cyumweru tariki 25 Kamena 2023, akazitabirwa n’amakipe 11 y’abagabo n’icyenda y’abagore; ahiganjemo amakipe asanzwe akina icyiciro cya mbere (Serie A) mu Rwanda.
Mu bagabo hazitabira amakipe arimo Nemo Stars VC na KAVC zo muri Uganda, Djuba VC yo muri Sudani y’Epfo, ndetse n’amakipe yo mu Rwanda arimo Gisagara VC, APR VC, KVC, REG VC, Police VC, IPRC Ngoma VC, IPRC Musanze VC na Kirehe VC.
Ni mu gihe mu bagore hazitabira Nemo Stars WVC na KAWVC zo muri Uganda, Djuba WVC yo muri Sudani y’Epfo, ndetse na APR WVC, Police WVC, RRA WVC, Ruhango WVC, IPRC Kigali WVC na IPRC Huye WVC zo mu Rwanda.
Biteganijwe ko mu bibuga bizakoreshwa ku wa Gatandatu tariki 24 Kamena 2023 mu mikino y’amajonjora harimo Maison des Jeunes Kimisagara, Kimironko Court, Well Spring Academy ndetse na Notre Dame des Anges, mu gihe ku Cyumweru tariki 25 Kamena 2023, imikino ya kimwe cya kabiri n’imikino ya nyuma (finals) izabera muri BK Arena.
