NEC itangaje iby'ibanze byavuye mu matora y'Umukuru w'igihugu
![NEC itangaje iby'ibanze byavuye mu matora y'Umukuru w'igihugu](https://umusarenews.com/public/default-image/default-730x400.png )
Ku mugoroba wo kuri uyu wa Mbere tariki 15 Nyakanga 2024, Komisiyo y'igihugu y'amatora (National Electoral Commission-NEC) yatangaje iby'ibanze byavuye mu matora y'Umukuru w'igihugu, Paul Kagame wa FPR-Inkotanyi yanikira bagenzi be.
Ni nyuma y'aho kuri uyu wa Mbere tariki 15 Nyakanga 2024 habaga amatora ku Banyarwanda bari imbere mu gihugu, ndetse no ku Cyumweru tariki 14 Nyakanga 2024 hakaba hari habaye amatora nk'aya mu Banyarwanda bari mu mahanga (Diaspora).
Mu gutangaza iby'ibanze byavuye muri aya matora, Perezida wa Komisiyo y'igihugu y'amatora, Madame Oda Gasinzigwa yatangaje ko Abanyarwanda bitabiriye amatora ku kigero gishimishije cya 98%.
Yakomeje avuga ko Umukandida wa FPR-Inkotanyi, Paul Kagame ari we kugeza ubu uri imbere y'abandi n'amajwi 99.15%, Dr Frank Habineza w'Ishyaka riharanira demokarasi no kurengera ibidukikije mu Rwanda (Democratic Green Party of Rwanda-DGPR) akaba ku mwanya wa kabiri n'amajwi 0.53%, mu gihe Philippe Mpayimana wari umukandida wigenga kugeza ubu afite 0.32%.
Kugeza ubu hamaze kubarurwa amajwi 7,160,864 angana na 79.9% by'amajwi 9,071,157 y'abanyarwanda bari kuri lisiti y'itora muri rusange.
Ni mu gihe gutangaza ibyavuye mu matora by'agateganyo bitazarenza tariki 20 Nyakanga 2024, naho gutangaza ibyavuye mu matora ku buryo bwa burundu bitazarenza tariki 27 Nyakanga 2024.
![](https://umusarenews.com/public/default-image/user.jpg)
Jonathan Habimana
Comment / Reply From
You May Also Like
Popular Posts
Newsletter
Subscribe to our mailing list to get the new updates!