Kuri uyu wa Kane tariki 31 Ukwakira 2024, ku rukiko rw’ibanze rwa Kicukiro habereye urubanza rwa Miss Rwanda 2022, Muheto Nshuti Divine, ubushinjacyaha bumusabira ibihano bitandukanye ku byaha aregwa, bigera ku gifungo cy’umwaka n’amezi 8 ndetse n’ihazabu y'ibihumbi 220 by'u Rwanda.

Nyuma yo guhabwa umwanya, ubushinjacyaha bwavuze ko uyu mukobwa yanywereye mu kabari kitwa ‘Atelier du vin’ bigeze saa sita z’ijoro afata imodoka ye modoka yo mu bwoko bwa KIA SPORTAGE arataha; ageze mu Kagari ka Nyakabanda, Kicukiro, ata umuhanda agonga ipoto y’amashanyarazi n’umukindo ndetse n’imodoka irangirika.

Bwakomeje buvuga ko kubera ubumenyi buke mu gutwara imodoka no kuba yanyweye ibisindisha ku rwego rwo hejuru byatumye agonga ipoto y’amashanyarazi n’umukindo; aho ngo yapimwe bikagaragara ko mu mubiri we harimo alcohol yo ku kigero cya 4.00 kandi umuntu atagomba kurenza 0.8.

Bwavuze ko nyuma yo kugonga yaje guhunga, abaturage baramuhururiza ariko nyuma aza kugaruka aje kujyana telefoni ze, asanga Polisi yahageze akajya avuga ko atari we wari utwaye icyo kinyabiziga.

Ubushinjacyaha kandi bwavuze ko atari ubwa mbere ibyo bikorwa abikoze ahubwo kuko no ku wa 23 Nzeri 2024 yari yagiriwe inama ndetse anasaba imbabazi; busaba Urukiko ko rwamuhamya ibyaha bitatu akurikiranyweho.

Mu kwiregura, Miss Muheto Divine umaze iminsi 11 afunzwe kuva igihe yafatiwe, yavuze ko iminsi 11 amaze afunzwe yize isomo rikomeye, ko asaba imbabazi ndetse ko ibyo yakoze bitazongera; akemera icyaha gutwara yasinze no gutwara ikinyabiziga nta ruhushya, ndetse no kugonga; ariko ko atahunze impanuka imaze kuba, ahubwo ko abantu benshi bahuruye batangira kumuhamagara mu mazina, agira ubwoba ko bashobora kumugirira nabi, ndetse bakaba bamufotora; ahitamo kwigira hirya gato ngo aze kugaruka inzego z’umutekano zimaze kuhagera.

Ibihano Ubushinjacyaha bwasabiye Miss Muheto:

Ubushinjacyaha bwasabye ko ku cyaha cyo gutwara yasinze yahanishwa igifungo cy’amezi atandatu n’ihazabu y’amafaranga y’u Rwanda ibihumbi 180.

Ku cyaha cyo gutwara imodoka nta ruhushya rwemewe afite, Ubushinjacyaha bwasabye ko yahanishwa igifungo cy’amezi abiri n’ihazabu y’amafaranga ibihumbi icumi.

Ku cyaha cyo guhunga nyuma yo guteza impanuka, Ubushinjacyaha bumusabira gufungwa umwaka umwe n’ihazabu y’amafaranga y’u Rwanda ibihumbi 30.

Muri rusange, Ubushinjacyaha bwasabiye Miss Muheto Nshuti Divine gufungwa umwaka n’amezi umunani n’ihazabu y’amafaranga ibihumbi 220 kubera ibyo byaha bitatu aregwa.

Biteganijwe ko urubanza rwe ruzasomwa tariki 06 Ugushyingo 2024 saa cyenda z’amanywa.