Urukiko rurinda iremezo ry'itegekonshinga muri Repubulika ya Demokarasi ya Congo (RDC) rwemeje kandidatire zose z'abakandida-Perezida zari zatangajwe by'agateganyo n'akanama k'amatora k'icyo gihugu, harimo n’iya Moïse Katumbi.

Ni nyuma y’Inteko y'abacamanza yateranye ku wa Mbere tariki 30 Ukwakira 2023, na nyuma y'ibirego byari byatanzwe n'abarimo Noël Tshiani, washakaga kuburizamo kandidatire y'umunyapolitiki Moïse Katumbi utavuga rumwe n'ubutegetsi, aho Urukiko rwavuze ko icyo kirego cyakiriwe ariko ko nta shingiro gifite.

Tshiani yari yavuze ko Katumbi yari asanzwe afite ubundi bwenegihugu butari ubwa RDC igihe yabonaga icyemezo cy'ubwenegihugu bwa Congo, nk’uko bitangazwa n'ibinyamakuru byaho.

Urukiko rwanemeje kandidatire ya Perezida Félix Tshisekedi, nyuma y’aho uwitwa Seth Kikuni yari yatanze ikirego gisaba kuburizamo kandidatire ye kubera gukoresha amazina atandukanye, aho Kikuni yavuze ko mu matora yo mu 2018 yakoresheje izina ‘Tshisekedi Tshilombo FELIX’, mu gihe mu matora ategerejwe yavuze ko yitwa ‘Tshisekedi Tshilombo FELIX ANTOINE’, bivuze ko yongereyeho izina ‘Antoine’; gusa Urukiko rwanzuye ko iki kirego nta shingiro gifite.

Hervé Diakese, umuvugizi w'ishyaka Ensemble pour la République rya Katumbi, yabwiye Radio RFI ko iki cyemezo cy'urukiko gisoje burundu ikibazo kijyanye n'ubwenegihugu bwa Katumbi.

Ati:

"Ni iherezo ry'inzira ndende cyane yo kurwanya akarengane, ikinyoma, kuyobya no gukwirakwiza amakuru atari ukuri agamije kuyobya. Uyu munsi, ku rwego rwo hejuru cyane rw'ubucamanza bwa Congo, ikibazo cy'ubwenegihugu bwe gishyizweho iherezo. Buri mpaka zose kuri iyo ngingo zifite umwanya ahantu hamwe gusa kandi Urukiko rurinda iremezo ry'itegekonshinga rwabonye uwo mwanya: ni ahajugunywa imyanda y'amateka."

Ni mu gihe ku ruhande rwa Tshisekedi, umwe mu bantu bari hafi ye yabwiye RFI ko Perezida atatunguwe n'icyemezo cy'Urukiko kandi ko ashishikajwe no guhatana na Katumbi mu buryo butarimo akarengane ndetse akamutsinda.

Tariki 19 Ukwakira 2023, nibwo akanama k'amatora ya Repubulika ya Demokarasi ya Congo katangaje urutonde rw'agateganyo rw'abakandida 24 mu matora ya Perezida ateganyijwe kuba tariki 20 Ukuboza uyu mwaka wa 2023, aho urwo rutonde ruriho n'andi amazina asanzwe azwi cyane muri icyo gihugu, nk'umunyapolitiki Martin Fayulu na Muganga Denis Mukwege wegukanye igihembo cy'amahoro cyitiriwe Nobel mu 2018.

Ni mu gihe nyuma y'itangazwa ry'urwo rutonde rw'agateganyo rw'abakandida-Perezida, abitwa Joëlle Bile na Enoch Ngila bari batanze ibirego mu Rukiko rurinda iremezo ry'itegekonshinga, binubira kurukurwaho, ariko kuri uyu wa Mbere Urukiko rwemeje kandidatire zabo bombi, bituma abakandida bose baba 26, barimo abagore babiri.