Ntaganda yateye ikirenge mu cya Ingabire asaba gukurwaho ubusembwa
Bernard Ntaganda uvuga ko atavuga rumwe n’ubutegetsi mu Rwanda, avuga ko yasabye urukiko kumukuraho ubusembwa kugira ngo abashe kuziyamamariza umwanya w’umukuru w’igihugu mu matora ateganyijwe tariki 15 Nyakanga uyu mwaka.
Ni nyuma y’aho Bernard Ntaganda w’ishyaka PS-Imberakuri mu gice kitemerwa n’amategeko mu Rwanda, mu mwaka wa 2012 yakatiwe gufungwa imyaka ine ahamijwe ibyaha birimo guhungabanya umudendezo w’igihugu, kubiba amacakuribiri, gukoresha imyigaragambyo itemewe n’amategeko n’ibindi; bikamushyiraho ubusembwa bwanatumye mu mwaka wa 2017 yangirwa kwiyamamaza kubera ubusembwa ashyirwaho n’icyo gifungo yakatiwe.
Ni mu gihe Ntaganda wigeze gusaba gukurwaho ubusembwa muri Werurwe 2019 ariko ntasubizwe, aje yiyongera kuri Victoire Ingabire wafunzwe mu 2010 akarekurwa nyuma y’imyaka umunani, nawe waregeye urukiko mu minsi ishize arusaba gukurwaho ubusembwa ngo abashe kwiyamamariza umwanya wa Perezida, aho umwanzuro w’Urukiko ku kirego cye utegerejwe tariki 13 Werurwe 2024.
Ishyaka PS Imberakuri, uruhande Me Ntagamda avuga ko ahagarariye, ryashinzwe tariki 17 Nyakanga 2009 ryemezwa mu igazeti ya Leta ku ya 09 Ugushyingo muri uwo mwaka ariko nyuma ricikamo ibice, Leta yemera uruhande ruhagarariwe na Madame Christine Mukabunane, ndetse mu Matora aheruka y’Abadepite yabaye tariki 02-04 Nzeri 2018 uru ruhande rwahataniye imyanya mu Nteko Ishinga Amategeko, aho Madame Christine Mukabunane na Niyorurema Jean Rene bagizwe Abadepite.
