Perezida Tshisekedi yakoze impinduka Vital Kamerhe na Jean Pierre Bemba binjira muri Guverinoma
Mu ijoro ryo ku wa Kane tariki 23 Werurwe 2023, Perezida Felix Tshisekedi wa Repubulika iharanira demokarasi ya Congo (DR Congo) yakoze impinduka muri Guverinoma agira Jean Pierre Bemba, Minisitiri w’ingabo na Vital Kamerhe, Minisitiri w’ubukungu, abagabo bombi bazwi cyane muri politiki y'iki gihugu.
Aba bombi ni bamwe mu banyapolitiki bazwi cyane muri DR Congo, muri izi mpinduka kandi bahawe umwanya wa Visi Minisitiri w’intebe, izi mpinduka zikomeye kurusha uko byari byitezwe, zikaba zibaye mbere y’amatora ya Perezida ateganyijwe mu Ukuboza uyu mwaka wa 2023, aho Tshisekedi ashobora kwiyamamariza manda ya kabiri.
Jean Pierre Bemba, wigeze kuba Visi Perezida wa DR Congo, yafunzwe imyaka 10 muri gereza y’urukiko mpuzamahanga mpanabyaha ku byaha by’intambara yakoze ubwo yari umukuru w’inyeshyamba zakoze ubwicanyi ndengakamere no gufata abagore ku ngufu muri Centrafrique, akaba yaragarutse muri DR Congo mu 2018 arangije igifungo.
Ni mu gihe Vital Kamerhe, inshuti ya hafi ya Tshisekedi, umwaka ushize yagizwe umwere nyuma yo gufungwa mu 2020 ashinjwa kunyereza imari ya leta igera kuri miliyoni hafi 48 z'amadolari ubwo yari umukuru w'ibiro bya Perezida Tshisekedi.
Bemba na Kamerhe ni bamwe mu binjiye muri guverinoma igizwe n’abantu 58 mu mpinduka, aho mu itangazo ryasomewe kuri televiziyo y’igihugu ku wa Kane nijoro, Umuvugizi wa Perezida yavuze ko zari zikenewe kandi zihutirwa.
Bemba na Kamerhe ni bamwe mu bantu bakomeye kandi bamaze igihe muri politiki ya DR Congo bashobora gukomeza uruhande rwa Tshisekedi mbere y’aya matora.
Ni mu gihe undi uzwi winjijwe muri Leta, ari Mbusa Nyamwisi Antipas wagizwe Minisitiri wa leta ushinzwe kwihuza n’akarere ndetse na Francophonie, uyu akaba yarahoze akuriye inyeshyamba za RCD-Kisangani we na Wamba Dia Wamba zarwanyaga uwari Perezida Laurent Kabila nyuma nawe yaje kwinjira muri leta, aba minsitiri w’igenamigambi kugeza mu 2011 ubwo yeguraga akiyamamariza kuba Perezida, gusa mu 2012 yahunze igihugu agaruka muri DR Congo mu 2019, aho bivugwa ko yatahutse nyuma yo guhura no kuganira na Perezida Tshisekedi i Nairobi muri Kenya.
